Jowai, Nawieng 30
Ka Executive Committee ka Jaiñtia Hills Autonomous District Council (JHADC) ka la thaw ïa ka Delimitation Committee ka ban khmih bniah ha kaba ïadei bad ka jingpynbeit ïa ki jaka puta jong ki konstitwensi ka JHADC bad ruh na ka bynta ban pynlong ïa ka jingpynsngew paidbah (public hearing) ha kaba ïadei bad kane ka phang.
Ka jingpynbna paidbah la pynmih ha ka Sngi Balang.
Katkum ka jingpynbna ne notification, la ong “Ban pynïaid shakhmat halor ka shithi jong ka Tnat District Council Affairs ka Sorkar Meghalaya No. DCA.22/2013/225, dt.20.11.2023, ka Executive Committee ka Jaiñtia Hills Autonomous District Council, Jowai ka pyntip ba la thaw ïa ka Delimitation Committee na ka bynta ban jurip bniah ha kaba ïadei bad ka jingpynbeit ïa ki jaka jong ki konstitwensi ka Jaiñtia Hills Autonomous District Council Constituency bad na ka bynta ban pynlong ïa ka public hearing ha kaba ïadei bad kane ka phang.”
Ki dkhot jong ka Committee ki kynthup ïa u Dr. A.S. Dakyntuhimi Lyngdoh, Asst. Professor kum u Chairman, Luckystar Ymbon, Advocate kum u Member Secretary. Kiwei pat ki dkhot ka committee ki dei u Markos Surong, Advocate, Kerlang Ksoo, Advocate bad Pyrkhat Shylla, Waheh Shnong Mookyrdup.
Ka Committee kan sa phah ïa ka kaiphod jong ka sha ka Executive Committee hapoh jong ka shi bnai.
