Williamnagar, Naiwieng 30
Ka National People’s Party (NPP) ha East Garo Hills kan tei ïa ka shlem treikam jong ka ha ka khyndew kaba dei jong ka sorkar jylla, bad na ka liang u Myntri ka tnat PHE, u Marcuise N Marak, uba dei ruh u MLA ka Williamnagar, u la kam ba ym dei tang ka NPP kaba leh kumne, hynrei ka Congress, UDP bad BJP ruh ki la tei ïa ki shlem treikam jong ki ha khyndew sorkar.
Ka shlem treikam jong ka NPP ka don ha Williamnagar ha ka jaka ba la tip kum ka Doki Ading bad ka don hapdeng ka shlem treikam jong ka DSEO bad ka District Library. Ka jingtei ïa kane ka shlem treikam ka NPP ka la sdang bad la pynthikna ruh ba ka khyndew ka dei jong ka sorkar.
Katkum ka jingbatai jong ka seng, la bud lut ïa baroh ki kyndon ban shim ïa katei ka jaka bad naduh ki snem ba mynshwa, la kyrpad ïa ki bor distrik ban ai jaka ban tei ïa ka shlem treikam jong ka seng. Nalorkata, la ïoh ruh ïa ki syrnod NOC (No-Objection Certificate) na baroh kiba ïadon bynta ha kane ka kam.
Na ka liang u Marcuise u la ong ba ka seng ka la hap ban pyndonkam da ka jaka sorkar namar ym da don ki jaka ki ‘riew shimet.
“Kane ka kam ka la urlong hadien ki jingïakren kiba bun namar kum ka distrik, ka la donkam ïa ka shlem treikam jong ka. Lada phi kwah ban kylli ïa ka NPP ba ka ïoh da ka jaka sorkar, phi dei ruh ban kylli lang na ka Congress bad ka UDP namar ma ki ruh ki la tei ïa ki shlem treikam jong ki ha ka jaka sorkar. Wat la shlem treikam ka BJP ruh ka ïeng ha ka khyndew sorkar. Ngim dei ma ngi kiba sdang ban leh ïa kane, ngi dei tang ki nongbud nuksa,” la ong u Marcuise.
