Shillong, Naiwieng 30
Kum shibynta ka jingrakhe ïa ka jingdap 30 snem ka kynhun ki nonghikai kaba don hapoh ka synjuk jong ka Meghalaya Upper Primary School Teachers Association (MUPSTA) kan sa pynlong ïa ka jingïakynduh lang bad baroh ki nonghikai skul ka Upper Primary na Rilum Khasi, Jaiñtia bad Garo ka ban sa long ha West Jaiñtia, Mukhla Ummulong ha ka 5 tarik u Nohprah 2023 ha ka por 11 baje mynstep.
Haba kren sha ki lad pathai khubor ha Shillong Press Club, u Bah Kenneth Shadap uba dei u President jong ka MUPSTA, u la ong ba ka jingpynlong ïa katei ka jingïakynduh lang ka long ruh kum shibynta ka jingïakynduh kaba khadduh namar hadien katei ka jingïakynduhlang bad baroh ki nonghikai skul Upper Primary ka jylla, un sa shongthait noh na ka kam President hadien ka jingshakri jong u la slem bah kata naduh ki snem 2001-2002.
U Bah Shadap u la ïathuh ba u kongsan ha katei ka sngi un dei u Rakkam A Sangma uba dei u Myntri ka tnad pule puthi ka jylla ha ryngkat ka jingïadonlang jong u nongaiktien ka tnad pule puthi ka jylla, u Bah HM Shangpliang, (IAS) bad u MDC katei ka thaiñ.
Ha katei ka sngi ka kynhun kan sa pyllait paidbah ïa ka Souvenir bad kan sa aiti ruh ïa ka dorkhas sha u Myntri ka tnad pule puthi ka sorkar jylla ha kaba ïadei bad ki mat ba kongsan jong katei ka kynhun.
U Bah Shadap u la ong ba kum ka kynhun ka la ïarap bad shimkhia ruh ha kaba ïadei bad ki nonghikai kiba shah weng kam khlem daw bad kiba shah ot palat ka tulop jong ki bad ka kynhun ka ïaleh ruh ha kajuh ka por ban ïatreilang bad ki nongpynïaid jong ki skul bapher bapher ban wad jingtip shaphang ki nonghikai jong ki skul.
Haba kylli ha kaba ïadei bad ka jingdawa ka kynhun ban kyntiew kyrdan na ka Adhoc Upper Primary sha ka Deficit System bad ka jingpynkiew ïa ka tulop ki nonghikai, u Bah Shadap u la ong ruh ba u ngeit skhem ba lada ka State Education Commission ka trei hok bad ka sorkar jylla ka shim ïa ka jingtyrwa jong ka State Education Commission, ki jingeh jong ki nonghikai baroh yn sa lah ban weng bad ki nonghikai kin ym donkam shuh ban hap mih sha surok ban dawa bad ïakhih na ka bynta ka tulop jong ki hynrei kan sa kiew hi manla u snem bad kin sa ïoh ïa ka tulop kaba biang.
“Kine ki Adhoc Upper Primary School ki dei kiba la rim bha naduh ki snem 1989-1990, ka la long kumba 30 snem tam bad kam shym la don kata ka jingkyntiew kyrdan sha ka Deficit System bad haduh mynta ruh kam pat don”, la ong u Bah Shadap.
U Bah Shadap u ngeit skhem ba ka sorkar ka la thung khnang ïa ka State Education Commission khnang ba ka rukom treikam jong baroh ka pule puthi kan long kaba thaw thymmai khnang ba yn lah ban weng lut ïa ki jingeh kiba la don mynshwa.
“Ngi khmih lynti ba mynta kan don ka hok lyngba kane ka State Education Commission namar ki briew kiba don hangto ki dei kiba la shemphang suda”, la ong u Bah Shadap.
