Shillong, Naiwieng 30
Ka kyrtong ka National People’s Party (NPP) na Shillong parliamentary konstitwensi, ka Kong Ampareen Lyngdoh ka la ong ba kan trei shitom kum ka kyrtong ka ban sa ïakhun ïa ka ilekshon MP bad ynda ka shahjied kum ka MP ka pynkhih win ha Parliament ïa ki mat kiba dei jong ka Jaitbynriew bad ka Jylla.
Haba kren sha ki lad pathai khubor ha ka Sngi Palei, ka Kong Ampareen ka la ong ba kan pan jingkyrshan khlem da kheiñ seng saiñ pyrthei, kan pyrshang ban ïoh ka jingkyrshan na ki kynthei bad ki samla bad don ka jingmut kaba biang lang haba ïadei bad ka niam.
Ka la ong ba ka NPP ka long kaba shai, kata ka long ban nang pynkhlaiñ ïa ka jingïoh vote kaba dei ha ki konstitwensi kiba hap ha Shillong parliamentary konstitwensi, ban pynïaid shakhmat ïa ki mat kiba dang sahteng la katto katne por kiba lah ban leh eiei da ka MP lada long ka nongjop.
“Ngi donkam ban ïaid khlem da kheiñ seng bad lada nga lah ban leh kumta ha ka kyrteng jong ka seng, kan long ka burom ïa nga. Kine ki dei ki mat kiba kongsan ban rah ïa ka lama ka NPP shalor bad shakhmat,” ka la ong.
Haba kylli kumno ka kheiñ ïa ka jingtreikam u MP ka Shillong uba mynta, u Bah Vincent H Pala, ka Kong Ampareen ka la ong ba kam wan ban ai jingkheiñ ïano ïano hynrei kan ïakynduh ïa uta u briew ha madan ïakhun ilekshon kum ki kyrtong MP.
“Ngan nym ong eiei kaei kaba u MP u la leh, kaei ka bym pat leh, hynrei ai ki briew kin ai jingkheiñ. Ngan wan hangne ha ryngkat ki mat jong ka seng bad ngi weng ïa ki jingmutdur ba ngi long kumjuh kum ka BJP. Hynrei ka NPP ka don la kajong ka dur ka dar bad ngin nym ngam ha kiwei pat ki jingmut ne ki nongrim kiba kiwei ki don,” ka la ong.
Ka la ong ba ka NPP ka dei ka NPP, bad ka dkhot jong ka NDA, bad ym don jingeh ban long ki paralok jong ka Sorkar khlehlang NDA.
“Shibun kiwei ki seng ruh ha Meghalaya ki dei ki dkhot ka MDA bad ngi donkam ban weng ïa ka jingsngew bad ngan leit sha ki paidbah ban pynshai pynsngewthuh,” la ong ka Kong Ampareen.
Halor ka jingbuh kyrtong da ki kynthei na Shillong bad Tura, ka Kong Ampareen ka la ong ba ka NPP ka la rai ban phah da ki kynthei kum ki kyrtong na kine ki ar tylli ki konstitwensi ka pyni ïa kaei kaba don ha ka seng. “Ngi dei ki kynthei bad ngi kular ïa ki paidbah ka Jylla ba kane ka seng ka dei kaba lah ban shah ïa kiei kiei. Ngi la don 33 na ka 100 ka bhah ïa ki kynthei ka ban sa urlong bad ngi kwah ban pyni nuksa haba ïadei bad kane.”
Haba kylli kumno kan long ha kane ka ilekshon haba ka NPP kaba ïatreilang bad ka UDP ha ka ilekshon 2019 mynta ki mih ban ïakhun mar la kajong, ka Kong Ampareen ka ong ba ka NPP ka la heh la san ha kine ki snem bad ha ka ilekshon MLA 2023, ka NPP ka bhah jingïoh vote ruh ka kiew bha ha kaba ki don ki kyrtong kiba rem tang khyndiat vote, hynrei ka jingïoh vote ka NPP ka la kiew bha ha ka ilekshon kaba dang shu dep mynta u snem.
Haba kylli halor ki jingkynthoh ba ka NPP bad kiwei ki seng kiba don hapoh ka Sorkar MDA ki dei kiba isih jaitbynriew, ka Kong Ampareen ka la ong ba kum kata ka jingmut kaba don, donkam ban weng noh shisyndon bad donkam ban pynkynmaw ïa ki paidbah ba ym dei ban shah ïalam bakla ha ki social media kiba kynthoh katba mon bad long shahliang bad ngi hap ban ïaid da ka lynti kaba khuid jingmut ha kallba yn pynphriang ïa kane ka khubor sha ki paidbah ha ryngkat ka jingkyrshan bad ïatreilang ki nongïalam bad nongtrei ka NPP ha kylleng ka Shillong parliamentary konstitwensi.
Ka Kong Ampareen ka kren ruh shaphang ka ïing ka sem kaba naduh ka por jong u kpa, Bah Peter G Marbañiang u la mih kum u shakri paidbah kum u MLA bad MP na Shillong bad hap ban bud ïa ki dienjat katba lah.
Ka la ong ba kan pynkhreh ïalade ban kiew ïa u lum Makashang bad ka khmih lynti ba kan long kata, kaba ki briew kin kren kumba ki kren shaphang u kpa jong ka bad shaphang u hynmen.
Haba kylli shaphang ki katto katne ki mat kum ka Inner Line Permit (ILP), ka Kong Ampareen ka la ong ba kane ka mat ka dei kaba ki 60 ngut ki MLA ki la dep mynjur lang bad ka Sorkar Jylla ha ka por ka MDA-I ka la leh ïa kaba dei ban leh na ka liang ka Jylla.
Kumta ka la ong ba kum ka MP lada ka shahjied kan sa ïasoh lang bad MP na Tura ka Agatha K Sangma ban rah ïa ki mat ka Jylla bad pynkhih win ha Parliament ban pynbor ba ki hap ban shim rai eiei.
Ka la kren ruh shaphang ka MRSSA kaba pynbeit thymmai kaba khlem pat lah ban pyntreikam bad kan nym kynriah na kaei kaba ka Sorkar Jylla ka la shim ki sienjam halor kane bad kan ïaid lang ha kajuh kajuh ka sur kumba ka Sorkar ka la dep maitphang naduh ka Sorkar MDA-I.
