Shillong, Nohprah 01
U Myntri Sorkar bad nongïalam ka United Democratic Party (UDP), Bah Paul Lyngdoh ha ka Sngi Thohdieng u la ong ba ka seng kan sa pynbna ïa ka kyrteng jong u kyrtong sha ka ilekshon Lok Sabha ha kine ki khyndiat taïew ban wan.
Halor ka jingkyrpad ba dang shen jong u State President ka NPP, Bah Prestone Tynsong ïa kiwei-kiwei ki seng ba ïatehlok ha ka Sorkar MDA ban kyrshan ïa ka kyrtong ka NPP, u Bah Lyngdoh u la ong, “Kumba ka long ha ka UDP, ngi la ïaid shakhmat ha ka ban pynithuh ïa u kyrtong jong ngi bad yn pyndep ïa ka kam ha kane ka shi bnai ban wan ne duna ïa kata.”
La ka long kaba shisha ba u President barim ka HYC, Bah Robertjune Kharjahrin u long uba hakhmat ban ïoh tiket na ka seng ha kane ka ilekshon MP (ban wan), u Working President ka seng u la kubur ba u Bah Kharjahrin u long uwei na kito kiba la pynpaw ïa ka jingkwah ban ïa aireng na ka seng ha kane ka ilekshon sha ka Lok Sabha.
“Kumba ka long, ki don kumba 3-4 ngut kiba pan tiket,” ong u Bah Lyngdoh haba kren sha ki lad pathai khubor.
Haba jubab halor ka jingpynbna ïa u kyrtong MP, u la ong, “Nga tharai kan long kaba la khreh ha kine ki khyndiat taïew ban wan.”
Ka UDP lem bad ka Hill State People’s Democratic Party (HSPDP) kiba ïadon lang hapoh ka shatri jong ka Regional Democratic Alliance (RDA) ki la rai ban pynïeng ïa u kyrtong ïamon lang na Shillong Parliamentary konstitwensi.
Na ka liang ka Bharatiya Janata Party (BJP), kawei na ki seng kaba ïatehlok hapoh ka Sorkar MDA ka la ïaid shakhmat ban pynithuh ïa u kyrtong u ban ïa aireng ha kane ka ilekshon sha ka Lok Sabha.
Kumba ka long mynta, ka Voice of the People Party (VPP), ka la pynbna ïa ka kyrteng u General Secretary ka seng, Dr. Ricky A.J. Syngkon kum u kyrtong ka seng na bynta ka ilekshon MP ban wan na Shillong Parliamentary konstitwensi.
Ha kajuh ka por, ka NPP ka la pynbna ïa ki kyrteng jong 2 ngut ki longkmie ki ban ïa aireng ha ka ilekshon MP ban wan – Dr. M. Ampareen Lyngdoh na Shillong Parliamentary konstitwensi bad ka MP ba mynta, ka Agatha K. Sangma na Tura Parliamentary konstitwensi.
Haba phai pat sha ka Congress, la khmih lynti ba ka seng kan pynïeng biang da u MP ba mynta, Bah Vincent H. Pala na Shillong Parliamentary konstitwensi.
Ha kawei pat ka liang, u Working President ka UDP u la ong ba ka kam ba ïadei bad ka ilekshon MDC ka la ïaid shaid-shaid bad ka State Election Committee (SEC) ka la ïakynduh ruh la katto-katne sien.
“Ngin sa lah ban mih shakhmat bad ka thup kyrteng ki kyrtong la kumno-kumno ha kaba kut u Kyllalyngkot,” u la ong.
