Mawkyrwat, Nohprah:
Ka la long ka jingkyrkhu kaba khraw ïa ki paidbah nongshong shnong jong ka dong ka thaiñ Borsora, Ranikor Block kiba kynthup bun tylli ki shnong hadien ki jingeh ba ki la mad da ki phew tylli ki snem namar ka jingsniew palat ka surok. Kine ki jingeh ki lah ban long noh ki jingkyrkhu namar ha ka 30 tarik u Naiwieng 2023, u Symbud Myntri Rangbah ka Sorkar jylla u Bah Prestone Tynsong uba khmih ruh ïa ka tnat PWD u la ïoh ban buh ïa u mawnongrim na ka bynta ban sdang pyntrei noh ïa ka surok Intermediate Road na Lailad sha Borsora.
Ïa kane ka surok kaba jngai kumba 6.4 km yn shna lyngba ka skhim Special Assistance to States for Capital Investment 2022-23 ha ka mang tyngka kaba T.18 klur.
Kum ban shu kdew ka surok na Lailad sha Borsora ka dei kawei na ki surok hapoh ka jylla kaba la pynmih shibun ka khajna ïa ka sorkar jylla na ka jingkhaïi ïa u dewïong bad mawshun sha Bangladesh.
Haba kren kum u kongsan ha ka jingïalang, u Bah Prestone u la pynpaw ba um ju sngewtynnad ban buh mawnongrim ïoh ka kam, kam dep. Kumta u la kyrpad ïa u Bah Pius Marweiñ, MLA ka thaiñ ban pyntikna ba ka kam ka dei ban dep hapoh 24 bnai.
Nalor kane u la kyntu ruh ïa ki karikor bad ki ophisar ba ki dei ban trei shitom bad ban pyntikna ban pyndep ïa kane ka jingtrei ha ka por kaba biang bad ka jingshna ka dei ban bha.
U la ïathuh ruh ba ka jingeh kaba khraw jong ka sorkar ban wanrah ïa ka roi ka par ka dei ka ‘jaka’ ba bunsien ki ïa khim mynsiem ban ai jaka lada wan kino kino ki projek haduh hap ban slem ka rukom treikam.
Namar kata, u kyrpad ïa ki bor pynïaid shnong bad ki bor hima ba kin ai ka jingïatreilang bad shim khia lang ïa kane ka kam.
Kumjuh ruh u wer u khot lang ïa ki seng bapher bapher da kaba kynthoh ruh “Wat shu nang tang ban wohkjat ba ka duna lane ba ka slem ka kam, ïoh phi ong ba ka dei tang na ka liang ka sorkar. Hynrei nga ong ïa phi ïa ki jyrwit-jyrwat to ïa kitkhieh lang.”
“Wat ba wan buh ïa une u mawnongrim ruh ki don ki jingpynthut hynrei ngi na ka sorkar ngi ong em namar ka dei na ka bynta ka jingmyntoi u paidbah. Na kata ka daw nga khot lang ïa ki seng, ki bor pynïaid shnong bad ki bor hima ba kin ai ka jingïatreilang khnang ba ka sorkar kan lah ban wanrah ïa ka roi ka par,” la ong u Bah Prestone.
Ïa ka jingïalang ha kane ka sngi la pynïaid da u Bah JNS Lakiang, Superintending Engineer PWD Roads Western Circle Nongstoiñ ha ryngkat ka jingdonlang u Bah K Mawa, Chief Engineer PWD Roads Meghalaya Shillong, Bah T Lyngwa, DC SWKHD, u MA Razi, Commissioner & Secretary PWD, Bah KC Nongrum, EE PWD Roads Ranikor Division bad kiwei kiwei.
