Shillong, Nohprah:
Ka Amazon India ka la ïasoi ïa ka soskular ïasngewthuh jingmut ne ka Memorandum of Understanding (MoU) bad ka Directorate General of Foreign Trade (DGFT) ban ïarap na ka bynta ka seng kam-seng jam naduh ka barit, bapdeng bad ba kham heh ne ka Micro, Small and Medium Enterprises (MSMEs) ban kyntiew ïa ka jingshalan ïa ki tiar e-commerce ha India. Ka jingthmu jong kane ka soskukar ka long ba ryngkat lang yn thaw ïa ki lad ban nang lah ban pyntbit ïa ki, ban ai jinghikai, bad wanrah ïa ki lympung ban kyntiew ïa ki MSME ha kylleng ki 75 tylli ki distrik, yn thaw ruh ïa ki lad ki lynti ban pynlong katto katne ki bynta jong ki district kum ki jaka shalan mar ne Export Hubs kumba la pruid dak ha ka kyndon treikam jong ka Foreign Trade Policy. Ka jingthmu jong kane ka sienjam treikam ka long ban pynïasoh ïa ki nongpynmih mar na ki thaiñ nongkyndong bad ki distrik kiba kham sha kyndong sha ka jylli jong ka jingshalan mar ha ka pyrthei. Ïa kane ka MoU la ïasoi ha ka jingïadon lang jong U Santosh Sarangi (Additional Secretary and Director General ka DGFT), Chetan Krishnaswamy (Vice President, Public Policy – Amazon) bad Bhupen Wakankar (Director Global Trade – Amazon India).
Ka Amazon bad DGFT kin phai khmat sha ki jinghikai ïa ki MSME shaphang ka jingshalan mar ha ka e-commerce bad ïarap ïa ki ba kin lah ban die ïa ki tiar ki tar bad ki mar ki mata sha ki nongthied ha kylleng ka pyrthei. Ka Amazon kan ailad ïa ki MSME ba kin ïoh ïa ki lad jingshakri jong kiwei pat ki kynhun ai jingshakri, ban ïarap ïa ki ba kin ïoh ïa ki jingshakri kum ka ‘Imaging’ ne ka jingpyni ïa ki dur ki dar jong ki tiar ki tar ne ki mar ki mata, Digital Cataloguing ne ka jingpynbeit bad buh ryntih ïa ki dur ki dar jong ki mar ki mata lyngba ka Digital, bad ban ïarap ha kaba ïadei bad ka khajna, kane kan ïarap ïa ki nongseng kam lajong ka India ba ki lah ban nang kyntiew shuh shuh ïa ka jingshalan ïa ki mar ki mata bad ki tiar ki tar ha ka ïew e-commerce bad ki Brand ka pyrthei. U Santosh Sarangi Additional Secretary bad Director General jong ka DGFT u ong- “Ha ka jingïatreilang kaba nyngkong bad ki rynsan e-commerce bapher bapher, ka DGFT ka la ïatehlok bad ka Amazon kum u mawjam ban pynurlong ïa ka thong ban kyntiew ïa ka ïoh ka kot ha ka liang ka e-commerce da $200-300 billion ha India kat ha ka snem 2030.”
