Shillong, Nohprah 01
Ka BJP ha Meghalaya ka la ai ka jingïaroh ïa ka Sorkar Pdeng kaba ïalam da u Myntri Rangbahduh u Narendra kaba la bteng biang ïa ka skhim ai khaw ei kaba tip kum ka Pradhan Mantri Garib Kalyan Anna Yojana (PMGKAY) ha kaba kin don 81.35 klur ngut kiba ïoh myntoi na ka bynta san snem.
U nongaiktien ka BJP ha Meghalaya, u Bah M Kharkrang u la ong ba kane ka skhim kaba la rai ban pyntreikam da ka Sorkar Pdeng kan treikam naduh ka 1 tarik Kyllalyngkot 2024.
La ong ba ka jinglut na ka bynta kane ka skhim kaba heh tam ha pyrthei kan kot sha ka T. 11.80 lak klur ha kine ki san snem.
U Bah Kharkrang u la ong ba ka sienjam ba la shim da ka Sorkar Pdeng lyngba u Myntri Rangbahduh, u Narendra Modi ban pyllait paidbah ïa ka Viksit Bharat Sankalp Yatra’ ha kylleng ka ri naduh ka 15 tarik Naiwieng 2023 ka la long shisha ka jingmyntoi ïa ki paidbah namar lyngba kane ka Yatra, ki nongshong shnong ki la ïoh jingshai bad jingtip shuh shuh shaphang ki skhim bapher bapher kiba pyntreikam da ka Sorkar Pdeng lyngba ki Jylla bapher bapher.
Ha kawei pat ka liang, u Bah Kharkrang u la ong ba un jin da sngewtynnad eh lada u MLA uba la shahjied hynriew sien lynter na Pynthorumkhrah bad Myntri Sorkar u Bah A L Hek, un dei u kyrtong ka BJP ban ïakhun ïa ka ilekshon Lok Sabha na Shillong.
U la ong ba haduh mynta ki nongïalam ka BJP na Delhi kim pat pan kano-kano ka jingtyrwa na Meghalaya haba ïadei bad kane ka kam namarba lehse ki dang ap hadien ka ilekshon MLA ha ki san tylli ki Jylla.
Haba kylli la ka BJP ruh ka lah ban phaikhmat ban buh kyrtong da ka kynthei ha kane ka ilekshon MP, u Bah Kharkrang u la ong ba ka jingkhang ka plie ïano-ïano na ki briew ka seng kiba kwah ban pan tiket kynthup ïa ki kynthei. Hynrei ym pat don kano-kano ka rai ban buh kyrtong da ka kyrteng.
U Bah Kharkrang u la ong ba kaba donkam ka long ban peit la ka seng ka don ne em u kyrtong uba biang, bad kan jin da sngewtynnad eh lada ïoh da ka kynthei kum ka kyrtong.
U la ong ruh ba ka BJP kam ïatreilang bad kino-kino ki seng saiñ pyrthei ha shwa ka ilekshon Lok Sabha da kaba pynkynmaw ruh ha ka ilekshon MP ha u snem 2019 ha kaba ka BJP ka buh kyrtong na Shillong bad Tura parliamentary konstitwensi ban ïakhun ïa ka ilekshon marwei.
