Mawkyrwat, Nohprah 01
U Symbud Myntri Rangbah ka Sorkar Jylla uba khmih ïa ka tnad PWD ha ryngkat ka jingdonlang u Bah Pius Marweiñ, MLA ka Ranikor konstitwensi ha ka Sngi Palei ki la hiar jurip ïa ka surok ‘Two-Lane’, Ranikor- Nongjri Maheshkhola.
Ka jinghiar jurip ïa katei ka surok ha katei ka sngi ka dei hadien ba ka kompeni ba pyntrei ïa katei ka surok – ka Dhar kompani ka la pynrit ïa ka surok na ka ‘Two-Lane’ sha ka ‘Single- Lane’ haduh kumba 4 km eiei kata naduh jingkieng Ranikor haduh Lad Aluk Wareng.
Ha katei ka jinghiar jurip la ïadonlang ruh ki heh ophisar jong ka NHIDCL bad na ka liang u Bah Prestone Tynsong u la ban jur bad bthah ruh ïa kiba khmih ba kin pynheh biang ïa katei ka surok sha ka ‘Two- Lane’.
Ha kawei pat ka liang haba ïakren bad ki lad pathai khubor, u Bah Prestone Tynsong u la ïathuh ruh ba ïa ka bynta ba ar (Phase – 2) jong ka surok Nongstoiñ-Wahkaji ka ban bteng sa na Wahkaji-Phlangdiloin haduh Ranikor mynta ka la don ha ka jingpynkhreh bad u la ïathuh ruh ba ka bynta kaba ar ban shna ïa katei ka surok ka la tikna bad kan dei ruh ka surok ‘intermediate’.
