Shillong, Nohprah 01
Ha kawei ka jingjia, ki pulit ha ka Sngi Thohdieng ki la lap noh ïa ka thuk-thuk kaba la shah tuh na Mawlai Mawkynroh ha Mawlaidong hadien ba u nongñiah u la kum leit tynrah ïa u dieng katba u dang pyrshang ban phet na ki pulit.
Katkum ka jingtip ba la ïohlum, ha ka por kumba 3 baje mynstep jong ka Sngi Thohdieng, ki pulit ki la ïoh khubor halor ka jingshah tuh jong kawei ka thuk-thuk (ML-05R-2763) na Mawlai Mawkynroh. Hadien katto katne por, ki pulit ki la lap ba ïa katei ka thuk-thuk la ñiah da uwei u briew u bym lah ban ithuh ha Mawlaidong kaba hap ha Mawsynram, East Khasi Hills.
Mar ïa ïohi ïa ki pulit, uta u nongñiah ïa katei ka thuk-thuk u la pynher sted, hynrei u la kum ïoh leit tynrah pynban ïa u dieng. Na ka liang ki pulit ki la ïoh kurup noh ïa ka thuk-thuk, hynrei u nongñiah u la ïoh lad ban phet krad.
Ha kawei pat ka jingjia, u Tyngshaiñlang Nongrang u la ujor ba ha ka 28 tarik Naiwieng, ki runar ki la tuh ïa ka thuk-thuk jong u kaba don ïa u nombor ML-05Q-6573 na phyllaw ïing ha ka shnong Langstiehrim, Pyndengumïong ha Eastern West Khasi Hills.
Sa ha kawei pat ka jingjia, u Ajoy Hajong u la ujor ba ha ka 28 tarik Naiwieng, ki runar ki la tuh ïa ka Scooter jong u (ML-08H-9448) na ka phyllaw jong ka Maternity & Child Hospital, Tura.
Nalorkata, la ïoh jingtip ba u Shyam Bhavan u la ujor ba ka thuk-thuk jong u kaba don ïa u nombor ML-08H-2960 ka la jah rngai na Beldapara, Tura naduh ka 29 tarik Naiwieng.
