Nongstoiñ, Nohprah 01
U Superintendent of Police, West Khasi Hills District, u B D. Marak, MPS, u la pynmih ïa ka hukum sha baroh ki paidbah, ba kum ka jingbud ryntih ïa ka kyndon ba 101 jong ka Meghalaya Police Act 2010, u la kyntu ïa baroh ki nongshong shnong ba kin long kiba adkar bad ban ym pynkheiñ aiñ, la ka dei ha ki lynti syngkien ne ha ki jaka jngoh kai pyrthei kiba don hapoh ka distrik, kumjuh ban kiar na ka jingpynthut lane pynmynsaw ïa kiba leit ba wan bad ba kim dei ban pynjaboh bad pynjakhlia ïa ka sawdong-sawkun la ka dei ïa ki lynti syngkien lane ki jaka jngoh kai pyrthei kiba don hapoh ka distrik.
Ha ka kyrwoh khubor ba la phah, u la ong ba kiba leh pyrshah ïa katei ka hukum, lada lap kin ngat ha ki kyndon kiba tyngeh jong ka aiñ kaba kynthup ïa ka kyndon U/S 102 jong ka Meghalaya Police Act 2010 bad lada la shah rai pynrem hapoh jong ka aiñ, yn sa shah daiñ kuna haduh T.5000.
U SP u la kyntu ïa baroh ki nongwan jngoh kai pyrthei kiba wan jngoh kai shapoh ka distrik ba kin rah ryngkat ki ‘Pla Thep Jaboh’ hapoh ki kali jong ki, khnang ban ïoh thep ïa ki bilor umdih, ki plastik ‘chip’ bad kiwei-kiwei kiba ki pyndonkam, bad ban bret ïa ki ha ki jaka ba dei ban bret.
Ka kyrwoh khubor na u SP ka West Khasi Hills u la ong ruh ba halor kane, ka tnad pulit jong ka distrik ka khmih lynti ïa ka jingïatreilang jong baroh ki paidbah bad ki nong wan jngoh kai pyrthei kiba ju wan shapoh ka distrik.
