Shillong, Nohprah 01
Ka jingsangeh kamai kynsan jong ki kali saw barit ha ki thaiñ Motphran bad Khyndailad ka la pynlyngngoh shikatdei eh ïa ki paidbah kiba pyndonkam da kitei ki kali khamtam ki ju shim shiteng ka dor haba ïanujor bad ki taksi kamai.
Ki paidbah nongleit nongwan kiba pyndonkam da ki kali saw barit sha ki thaiñ Motphran bad Khyndailad ki la ud la nam shikatdei eh ha kaba ïadei bad ka jingbym don kitei ki kali saw. Kumta na ka liang U Nongsaiñ Hima u la sngap ïa kane ka jingud jingnam jong ki paidbah nongshong shnong bad u la leit ban wad ïa ka daw tynrai kaei kaba la pynlong ïa kitei ki kali saw barit ba kin sangeh kamai sha kitei ki thaiñ.
Ki kali saw barit kiba ju kamai kham bun na ki thaiñ Motphran ter ter sha Nongrah, NEIGRIHMS, Polo bad sha kiwei kiwei ki jaka mynta ki la hap ban kamai tang haduh ïingkashari. Kane ka la buh jingeh ïa ki paidbah kiba thmu ban leit sha ki thaiñ Motphran bad Khyndailad bad pynlong ruh ïa ki paidbah ba kin ym shong shuh da kitei ki kali saw kaba la wanrah pynban ka jingktah kaba jur ïa kitei ki nongñiah kali saw ba kin pynmih ïa ka bai kamai bad ba kin im jakpoh lyngba katei ka lad kamai.
Haba ïoh ban ïakren bad katto katne ngut ki nongkamai kali saw kiba rit, ki la ïathuh ba kim tip satia ïa ka daw kaba ki la shah ban pynsangeh kamai sha ki thaiñ Motphran bad Khyndailad hynrei kane ka jingshah pynsangeh ka la jia hak-dak kata ha ka 10 tarik u bnai Naiwieng 2023 hadien ka jingïoh hukum ba ïa ki kali saw yn nym shah shuh ban rung sha ki thaiñ Khyndailad bad Motphran.
“Na ka liang jong ki paidbah bad na ka liang jong ka shnong baroh ki la shah ktah ha ka leit ka wan bad kine kiba kamai ruh ki la shem jynjar bad kim shym lah shuh ban pynmih ïa ka kamai na ka bynta ka bai umphniang bad nadong shadong hi ka la ktah”, la ong kitei ki nongñiah kali.
Haba pyrshang ban kylli ïa ka daw jong kane ka jingshah pynsangeh ïa kitei ki kali saw, ki nongñiah jong kine ki kali ki la ïathuh ba katkum ka jingïoh jingtip jong ki kane ka jingshah pynsangeh kamai jong ki sha ki thaiñ Motphran bad Khyndailad lehse, ka dei namar ka jingdheng kali eh kaba jur ha kitei ki thaiñ. Kumta na ka liang ka sorkar ka la ong ba kan pyrshang shwa da kaba pyntreikam ban pynsangeh ïa kitei ki kali saw kumba 7 sngi eiei ban peit ïa ka jinglong jingman hynrei katei ka 7 sngi kaba la buh mynta ka la tam bad ka la jan kot pynban sha ka shibnai kynthih.
“Lehse ki ong ba ka dei na ka jingdheng kali ba ki ïaid kine ki kali saw hynrei nga shem ba ka jingdheng kali mynta ka sngi ruh ka jur bha bad ki kali saw kawei ruh kam don satia ha Motphran hynrei ka jingdheng kali kaba jur pat ka long beit kumjuh”, la ong kitei ki nongñiah kali kamai.
Na ka liang ki nongñiah jong kitei ki kali saw kiba ju kamai na Motphran ter ter sha Nongrah ki la ïathuh ba kitei ki kali saw hapoh Nongrah ki don kumba 24-25 tylli eiei, sha NEIGRIHMS ki don kumba 20 tam eiei, sha Mawpat bad sha Shyiap ki don hapoh 20 tylli eiei.
“Baroh kin da don kin don hapoh ka 80 tylli eiei namar ki don kiba la sniew bad buh hapoh ki karkhana”, la ong kitei ki nongñiah kali.
Haba kylli hato kan sa poi ka por ba ïa kitei ki kali saw yn sa hap ban set noh, kitei ki nongñiah ki la ong ba kata baroh ka shong ha ki briew kiba shim kontrak ïa kitei ki kali bad ha ka Municipal bad lada ka jingsiew sha ka Municipal ka biang, katei ka kam lehse, kan dang ïaid beit.
Kitei ki nongñiah kali saw ki la pynpaw ruh ba kane ka jingeh ka la ktah ym tang ïa ki paidbah nongleit nongwan hynrei wat ruh ïa kitei ki nongñiah kiba im bad kamai jakpoh lyngba katei ka kam.
“Lada dei ba ki pynsangeh kynsan kumne, ngi mynta ngin phai shaei bad ngin leit shaei, ngi baroh ki draibar kiba don da ki phew ngut mynta ngi la shu ud bad na ka liang jong ka sorkar lada ka la buh da ka por bad ka tarik ban pynkut ïa kitei ki kali saw, na ka liang ki nongñiah kali ruh ki la sngewthuh bad ki la wad lad wad lynti noh shawei”, la ong kitei ki nongñiah kali.
Ki nongñiah ïa kitei ki kali ki la pynpaw ba mynta ki sah hapdeng ka umdum khlem kano-kano ka jubab na ka sorkar. Ki la pynpaw ruh ba kane ka jingdheng kali hi kam dei na ki kali jong ki namar wat haba ym shah ban kamai ïa kitei ki kali sha ki thaiñ Motphran bad Khyndailad ruh hynrei ka jingdheng kali ha kitei ki jaka pat ka dang long kumjuh.
Shuh shuh ki la ïathuh ba ki la pyrshang ban leit mih sha Municipal ha ryngkat ka jingaiti da ka shithi ha ka 13 tarik u bnai Naiwieng 2023 hynrei haduh mynta, ka Municipal kam pat shym la ai jubab satia ha kaba ïadei bad kane.
Kumba ka long mynta ïa ki bos saw kiba heh la shah ban kamai ha ki thaiñ Motphran bad Khyndailad hynrei ïa kine ruh la shah ban kamai tang da kaba pynïaid da ka ‘Odd’ bad ‘Even’ nombar.
