Shillong, Nohprah 01
Ka jingdon jong ki briew kiba im bad u khñiang HIV hapoh Jylla haduh u Risaw, 2023 ka long 8384 ngut.
Katkum ki jingkheiñ kiba don bad ka Meghalaya Aids Control Society (MACS) haduh u Risaw mynta u snem, 8384 ngut ki briew kiba im bad u khñiang HIV ki la pynrung kyrteng na bynta ka jingsumar bad kiba bun ki dei napoh East Khasi Hills District.
Haba phai sha ki distrik hapoh ka Jylla, ka jingdon jong ki briew kiba im bad u khñiang HIV ha East Khasi Hills ka long 2611, West Jaiñtia Hills – 2441, East Jaiñtia Hills – 1976, Ri-Bhoi – 531, Eastern West Khasi Hills – 210, South West Khasi Hills – 115, West Khasi Hills – 112, West Garo Hills – 111, East Garo Hills – 23, North Garo Hills – 17, South West Garo Hills – 19, South Garo Hills – 18 bad kiwei-kiwei – 200.
Na ka liang ka Project Director ka MACS, Dr. B. Decruse haba kren sha ki lad pathai khubor hadien ka jingïalang jong ka prokram ‘World Aids Day’ kaba la long ha Madan Polo ha ka Sngi Thohdieng ka la ong ba ka jingdon jong ki briew ba la rangbah kiba im bad u khñiang HIV ha ka Jylla ka kham bun haba ïa nujor ha kylleng ka ri.
“Ka jingdon jong une u khñiang ha kiba la rangbah hapoh ka Jylla ka long 0.39%, katba ha ka ri ka long 0.21% – kaba ngi sngewthuh ba ngi kham bun,” ka la ong.
Ka la ïathuh ruh ba ki distrik hapoh ka Jylla kiba kham jur haba phai sha ka jingdon jong kiba im bad u khñiang HIV ki long ka East bad West Jaiñtia Hills.
“Kumba 60% na ka jingdon jong ki briew kiba im bad u khñiang HIV hapoh ka Jylla ki don ha kine ki 2 tylli ki distrik,” ka la ong da kaba bynrap ba kiwei ki distrik kiba kham jur ki kynthup ruh ïa ka East Khasi Hills bud sa ka Ri-Bhoi, West Khasi Hills bad kumta ter-ter.
Ha kawei ka liang, ka la ong ba ka jingdon jong ki briew kiba im bad u khñiang HIV ha ka Ri-lum Garo ka duna bha.
Hashuwa, haba ai jingkren kum u kongsan ha ka jingïalang, u Myntri ka tnad Social Welfare, Bah Paul Lyngdoh u la kyrpad ïa baroh ki nongshong shnong ban long ki nonglamkhmat ha ka jingïakhun khnang ban pynlong ïa ka Meghalaya kaba lait na u drok bad ka HIV/AIDS.
Ha kajuh ka por, u Bah Lyngdoh u la ban jur halor ka jingdonkam ban thaw ïa ka pateng ka ban synñiang, ban tei bad kyntiew ïa ka ri.
U Myntri u la ai jingïaroh ruh ïa ka jingtrei minot jong ka MACS hapoh ka jingïalam ka tnad ka koit ka khiah halor ki sienjam bapher-bapher ha ka ban pynsaphriang jingtip halor ka HIV/AIDS kaba la nang kiew hapoh ka Jylla.
Kumban shu kdew hangne, hadien ka jingïalang, bud sa ka ‘Red Ribbon Superstar Meghalaya Icon’.
Ka phang jong ka ‘World Aids Day’ mynta u snem ka long “Let Communities Lead”.
Ïa ka ‘World AIDS Day’ la ju rakhe man u snem ha ka 1 tarik Nohprah ha kaba ki paidbah ha satlak ka pyrthei ki kner ka jingkyrshan sha ki briew kiba im bad u khñiang HIV, ban wanrah ka jingkut ha ka jingkynthoh bad jingpeit beiñ ïa ki, kumjuh ban kynmaw burom ïa kito kiba la duh noh la ka jingim namar ki jingpang ba ïadei bad ka AIDS.
