Jowai, Nohprah:
Kan long ka sngi sah khana pateng hapoh ka Raij Chyrmang hapdeng ki Soo Langdoh Soo Raij ha kaba hadien bun tylli ki snem, u Kongwasan ka Raij Chyrmang ryngkat ka jingsakhi lang u Langdoh Jowai, Langdoh Tuber bad Langdoh Ialong ki la lah ban pyndep ïa ka lehniam ‘Ku Tyngkong’ u Pator ka Raij Jowai u waheh Raymon Nartiang.
Ka lehniam ‘Ku Tyngkong’ ka dei ka bynta kaba kongsan bha ïa u Pator ha kaba la ithuh pura ïa u bad lada don kano kano ka jingwit jingthut hapdeng ki Raij ne ki Soo Langdoh ka dei ka kamram jong u ban pyndep bad lada um lah pat ban pyndep un pyntip ïa u Dolloi khnang ba un (dolloi) leh ïa kaba donkam.
Ïa kane ka sngi la wan sakhi lang da u Dolloi ka Elaka Jowai u Waheh Puramon Kynjin ryngkat ki Wasan waheh ki shakri niam ka Raij Jowai, Tuber, Ialong, Kni ka Raij Jowai Waheh Myown Chyrmang bad ki waheh wasian ka Seinraij Jowai ba kynthup ïa u Hercules Toi, President bad ki nongïalam seng.
Shwa ban kit ban bah ïa u Pator Raymond Nartiang sha shiliang ka wah Myntdu ba long u pud u sam jong ka Raij u Kongwasan Chyrmang, u Dolloi u la ai ki kyntien lamkhmat nangta pynbud ka jingkren na ka liang u Langdoh Kongwasan bad na u Pator.
Ha kane ka sngi hapdeng ki riam ki beit, ki kup ki sem ba iphuh iphieng, ki khun ka Raij Chymang ki la pdiang burom ïa u Pator Raymond Nartiang ha shilynter ka lynti ïaid naduh ba u rung shapoh u pud u sam ka shnong Chyrmang haduh ban da poi ha Yung u Langdoh Kongwasan Chyrmang.
Ïa ka lehniam ba kyrpang jong ka ‘Ku Tyngkong’ u Pator Raymond Nartiang -Pator ka Raij Jowai la pyndep ha Yung Langdoh Ri Blai da ka Langdoh ryngkat u Langdoh Kongwasan ha ka jingïadonlang u Pa Dalloi Elaka Jowai Waheh Puramon Kynjin, u Langdoh Jowai, Langdoh Tuber bad Langdoh Ialong kumjuh ki shakri niam jong ki Sooraij Soo Langdoh.
Kane ka lehniam Ku Tyngkong u Pator ka Raij Jowai Waheh Raymond Nartiang ha ki taiew ki bnai ban wan kan long sa ha ka Raij u Langdoh Tuber bad Langdoh Ialong.
