Mumbai:
Ka Kriti Sanon kaba la wan shim bynta ha ka show jong u Karan Johar ka KWK ka la pynshai ba kam shym don kano kano ka jingbishni ia ka jingkiew ka Alia ha ka kam ak phlim da kaba ka la pynshai ba ka Alia ka dei hok ban kiew namar ba ka long ka puron kaba trei shitom bad nalor kane bun na ki phlim ba ka shim bynta ki dei kiba itynnad bad kaba la ieit ruh da ki nongpeitkai.
Ka Kriti kaba la iohrah ia ka National Award na ka bynta ka ‘Mimi’ ka sngew ba ka Alia ka dei ka nongai mynsiem ia kiba bun ki khynnah samla bad iaroh ia ki phlim ba la shim bynta da ka Alia kiba la khring ruh ia ka.
Ka Kriti bunsien ka ju shim nuksa ruh na ka Alia ha kaba iadei bad ki kam ba ka trei bad ong ba kane ka puron ka dei shisha kaba tbit bad kaba kynsai ha Bollywood.
Haba phai sha ka liang jong ki phlim knae ka puron ka la shim bynta ha ka Ganapath hynrei kane ka puron kam shym lah satia ban khring ia ki nongpeitkai bad ka la duhnong shibun.
