Shillong, Nohprah 01
Ka Election Commission of India (ECI) ka la hap ban pyndem toiñ ha ki paidbah ka Jylla Mizoram da kaba pynkynriah noh ïa ka sngi ñiew vote na ka 3 tarik Nohprah kaba hap ha ka Sngi U Blei sha ka 4 tarik Nohprah 2023, kata, ha ka Lah Sngi U Blei.
Ïa kane ka jingpynbna la pynmih da ka Election Commission of India katkum u kyrwoh ba la pyllait ha ka Sngi Thohdieng ka 1 tarik Nohprah.
Ka Election Commission ka la ong ba ka jingpynkynriah ïa ka sngi ñiew vote ka dei hadien ba la ïohpdiang shibun ki jingthoh na ka Jylla Mizoram ha kaba la kyrpad ban nym pynlong ïa ka jingñiew vote ha ka 3 tarik Nohprah 2023 kaba dei ka Sngi U Blei.
Ha ka jingshisha, baroh shikatta ka Election Commission ka la sngap man-man khlem ai kano-kano ka rai haba ïadei bad ki jingdawa ki paidbah ka Jylla Mizoram, namarba la dep buh ban pynlong ïa ka jingñiew vote ha ka 3 tarik Nohprah kaba hap ha ka Sngi U Blei ha ki san tylli ki Jylla kiba don ka ilekshon MLA, kita, ka Chattisgarh, Rajasthan, Madhya Pradesh, Telangana bad Mizoram.
Hynrei ka Election Commission ka la pyllait noh tang ïa ka Mizoram ha kaba yn ñiew vote noh ha ka Lah Sngi U Blei ka 4 tarik Nohprah katba ha kitei kiwei pat ki Jylla yn ñiew vote beit ha ka 3 tarik kaba hap ha ka Sngi U Blei.
