Shillong, Nohprah 03
Ka rynsan ïakob ‘thei bhabriew ba paw ka Jylla ne ka ‘Miss Shillong’ ka dei ka rynsan ban pyninam ïa ka jingbhabriew bad ka sap ka phong jong ki samla kynthei na ki bynta bapher-bapher ka Jylla.
Ha kawei ka liang, ka jingbym biang ha ka jingkyrshan pisa ka la long kawei na ki mawjynthut ba hakhmat na bynta ki nongpynïaid – Fashion Society Shillong (FSS).
Hynrei wat hapdeng kane ka jingeh, ka FSS ka ïai bteng bad pyntyllun ïa ki kam jong ka da kaba pynbiang ka rynsan ïa ki kynthei ka Jylla ban sei madan la ki sap ki phong.
Na ka liang ka FSS ka la pynmih ruh ïa ka rynsan ïakob ‘Mrs Shillong’ bad ‘Miss Supermom’ kum shi bynta ban ai mynsiem ïa ki ‘riew kynthei kiba kyrshan hi dalade ïalade.
Haba kren bad ki lad pathai khubor ha ka jingïakynduh bad ki ‘thei bhabriew ba la pynkhreh pynkhrum da ka FSS, u Chairman, Bah Aldous Mawlong u la ong, “Ka jingïaid lynti jong ngi ka la sdang ha u snem 1983. Ha ka por ba ngi sdang ïa kane, kam da don than eh kata ka jingpynkhreh jingpynkhrum, hynrei ngi shem ba ki kynthei ki donkam ïa kane namar ki wan na ki bynta bapher-bapher bad kumta ka jingthmu ka long ba baroh ki dei ban ïoh ka lad ban khreh ban khrum, ban hikai kumno ban ïaid, kumno ban kren bad kumno ba nym tieng haba kiew ha rynsan.”
U la ong ruh ba ka FSS ka ju ai jinghikai 2 bnai ïa kito kiba wan ïakhun sha kane ka rynsan ïakob khnang ba kin ïoh mynsiem bad shlur haba ki shim bynta ha ka jingïakob bad kiew rynsan.
Haba pynsngew ba kawei na ki mawjynthut kaba ka FSS ka ïakynduh ka dei ha liang ka pisa, u Chairman u la ong, “Lada ngi ïoh ka jingkyrshan pisa, ngi lah ban leh shibun kiei-kiei namar ngi la pynïaid ïa ki rynsan ïakob ‘thei bhabriew ha kine ki 40 snem ba la leit. Ha kajuh ka por, une u snem u dei u snem ha kaba ka FSS ka la kynjoh 40 snem. Kumta ngi sngewkmen bad ngi kyrmen ba kan nang kiew shaphrang bad manbha.”
Haba kylli, u Bah Mawlong u la ong, “Khlem ka jingkyrshan ka Sorkar, ngin ym lah ban ïaid shakhmat namar ki tnad treikam kiba ïasnoh bad kane ki kynthup kum ïa ka tnad kyntiew ïa ki samla, ïalehkai, lariti, kam jngoh kai naba ka khring bun bah ki nongwan jngoh kai, ka tnad Sericulture & Weaving – kine ki dei ki tnad kiba ïasnoh bad kane. Hooid, ki ju ïarap bad wat hapdeng ka jingduna pisa, ki pyrshang ban ïarap beit ïa ngi la ka long ha kano-kano ka liang bad nalor kata, ki kompeni, ‘riew shimet, nongkyrshan bad kiwei-kiwei.”
Haba pynsngew ïa ka jingïaid lynti hadien ba jop ïa ka rynsan ïakob ‘Miss Shillong, 2023’, ka samla Chaivalry Lartang, ka la ong ba ha shuwa, kam da kham kren briew, hynrei ynda la jop ïa kane ka rynsan ïakob, ka la sdang ban mih shakhmat bad ai mynsiem ruh ïa ki samla kiba don ka jinglehraiñ kum ma ka. Ka la kyrpad ruh ïa ki para samla ban don ïa ka thong ha ka jingim bad ban ban kynjoh ruh ïa ka.
Kumjuh, hadien ba la ïoh rah ïa ka nam ‘Miss Cherry Blossom’, ka samla Jollyne Lyngdoh ka la ong, “Nga kwah ban pynsngew sha baroh kito ki samla kiba artatien ïalade bad pyrkhat ba kim long kiba bit namar nga ruh nga la long teng kumne mynshuwa bad ban mih na kane, kam long kaba suk, hynrei phin hap hi shisien ka sngi. Mih shakhmat bad kren na bynta lajong namar lada phi leh kumta, nga sngew ba phin long kiba kmen bad phin im ïa ka jingim kaba phi kwah barabor.”
Ka samla Hazel Mukhim ka la pynpaw ka jingkmen hadien ba la ïoh rah ïa ka nam ‘Best Traditional Model’.
“Nga sngew sarong namar nga ïoh lad ban ïaid rynsan da kaba sem ïa ka ‘dhara’, kumta nga sngew sarong ban ïaid rynsan bad nga sngew sarong ruh ba nga jop,” ka la ong.
Na ka liang ka Kong Genevieve Pala, ka kmie jong 3 ngut ki khun ka la ong ba ka jingjop ïa ka ‘Ms Supermom’ ka long ka jingkmen bad ka jingkyrkhu ïa ka.
“Nga sngew ba kane ka rynsan ‘Supermom’ kan ai mynsiem ïa kiwei pat ki para longkmie. Ban long ka ‘riew kynthei kaba kyrshan hi dalade ïalade kam dei kaba suk. Bun ki jingeh, ki mawjynthut ha ka jingim kiba nga ïakynduh, hynrei hooid, nga la jop lut ïa kine baroh,” ka la ong.
Shuh shuh ka Kong Evangel Lartang, kaba trei kum ka Pharmacist bad ka kmie jong i khun kynthei ba dang 2 snem ka rta ka la ïoh rah ïa ka nam ‘Mrs Northeast India 2023’. Ka la ong ba ka jingïakob ka long kaba jwat ban ïakhun bad kiwei pat ki kynthei na ki Jylla bapher-bapher jong ka thaiñ.
