Shillong, Nohprah 03
Ka jingdon jong ki briew kiba jah rngai ha East Khasi Hills naduh u snem 2019 haduh ka 30 tarik Nailur, 2023 ka long 958 ngut.
Katkum ka jingkheiñ ba la ïoh lum na ka tnad pulit, 251 ngut ki briew ba kynthup ïa 118 ngut ki shynrang bad 133 ngut ki kynthei ki la jah rngai ha u snem 2019.
Na kitei ki 251 ngut, 181 ngut ki dei kiba la 18 snem shaneng (84 ngut shynrang bad 97 ngut kynthei), 53 ngut kiba hapdeng 14 haduh 18 snem ka rta (24 ngut shynrang bad 29 ngut kynthei) bad 17 ngut kiba hapdeng 5 haduh 13 snem ka rta (10 ngut shynrang bad 7 ngut kynthei).
Hadien ka jingtohkit, ki briew kiba la lap biang na kitei ki 251 ngut kiba la jah rngai ki long 210 ngut.
Ha u snem 2020, 134 ngut ki briew ki la jah rngai ba kynthup ïa 72 ngut ki shynrang bad 62 ngut ki kynthei. Na kine, 112 ngut ki dei kiba la 18 snem shaneng (66 ngut shynrang bad 46 ngut kynthei), 18 ngut kiba hapdeng 14 haduh 18 snem ka rta (4 ngut shynrang bad 14 ngut kynthei) bad 4 ngut kiba hapdeng 5 haduh 13 snem ka rta (2 ngut shynrang bad 2 ngut kynthei).
Na kitei ki 134 ngut, la lap biang ïa 103 ngut kiba la jah rngai ha utei u snem.
Ha kajuh ka por, 168 ngut ki briew ki la jah rngai ha u snem 2021 ba kynthup ïa 73 ngut ki shynrang bad 95 ngut ki kynthei. Na kine, 117 ngut ki dei kiba la 18 snem shaneng (57 ngut shynrang bad 60 ngut kynthei), 38 ngut kiba hapdeng 14 haduh 18 snem ka rta (9 ngut shynrang bad 29 ngut kynthei) bad 13 ngut kiba hapdeng 5 haduh 13 snem ka rta (7 ngut shynrang bad 6 ngut kynthei).
Ki pulit hadien ka jingtohkit ki la lap ïa 154 ngut na kitei kiba jah rngai ha utei u snem.
Haba phai sha u snem 2022, ki don 239 ngut ki briew kiba la jah rngai ha une u snem ba kynthup ïa 108 ngut ki shynrang bad 131 ngut ki kynthei. 177 na kine ki dei kiba la 18 snem shaneng (91 ngut shynrang bad 86 ngut kynthei), 47 ngut kiba hapdeng 14 haduh 18 snem ka rta (12 ngut shynrang bad 35 ngut kynthei) bad 15 ngut kiba hapdeng 5 haduh 13 snem ka rta (5 ngut shynrang bad 10 ngut kynthei).
Na kitei ki 239 ngut, la lap biang ïa 187 ngut.
Shuh shuh, naduh ka 1 tarik u Kyllalyngkot, 2023 haduh ka 30 tarik u Nailur, 2023, ki la don 166 ngut ki briew kiba la jah rngai bad kynthup ïa 78 ngut ki shynrang bad 88 ngut ki kynthei. Na kine, 117 ngut ki dei kiba la 18 snem shaneng (65 ngut shynrang bad 52 ngut kynthei), 40 ngut kiba hapdeng 14 haduh 18 snem ka rta (11 ngut shynrang bad 29 ngut kynthei) bad 9 ngut kiba hapdeng 5 haduh 13 snem ka rta (5 ngut shynrang bad 4 ngut kynthei).
Na kitei, la lap biang ïa 124 ngut hadien ka jingtohkit.
Napdeng kitei 958 ngut kiba jah rngai na East Khasi Hills ha kine ki 5 snem duna ba la leit, kiba dang jah rngai haduh mynta ki long 180 ngut katba 12 ngut ki la khlad noh (7 ngut shynrang ha u 2022 bad 5 ngut ha u 2023 – 4 shynrang, 1 kynthei) hadien ba lap ïa ki.
