Hyderabad, Nohprah 03
U khlieh duh ki pulit lane Director General of Police (DGP) ka jylla Telangana, u Anjani Kumar, u la shah sospon ha ka Election Commission of India (ECI) ha ka Sngi U Blei hadien ba u la leit ïakynduh ïa u heh ka seng congress ha Telangana katba ka jingñiew ïa ki ‘vote’ ka dang ïaid.
Katkum ki dur khih ba la paw, u Kumar u la leit ïakynduh ïa u President ka seng Congress ha Telangana, u Anumula Revanth Reddy, katba ka jingñiew ïa ki ‘vote’ na ka bynta ka ilekshon sha ka Ïingdorbar Thawaiñ ka dang ïaid.
Ka ECI ka la shim ïa katei ka jingleit ïakynduh jong u DGP ïa u Reddy kum ka jingpynkheiñ ïa ki kyndon ‘Model Code of Conduct’. Lah ban kdew ba ka seng Congress hapoh ka jingïalam jong u Reddy kan sa thaw ïa ka sorkar bathymmai ha Telangana hadien ba ka la pynliem donburom ïa ka seng BRS hapoh ka jingïalam u KC Rao kaba la synshar mynta la 10 snem.
Ha ka jaka jong u Kumar, ka ECI ka la ai hukum ban thung ïa u Ravi Gupta, IPS kum u khlieh duh ki pulit lane DGP ka Telangana naduh mynta ka sngi hi. Baroh shi katta, u Gupta u dei u Director General ka tnat Anti-Corruption Bureau (ACB).
Nalor jong u Kumar, kiba la leit ban ïakynduh lang ïa u Reddy ki long u Police Nodal Officer, u Sanjay Jain bad Nodal Officer (Expenditure), u Mahesh Bhagwat. Ha kane ka jingleit ïakynduh ïa u Reddy ha Hyderabad, utei u heh pulit u la rah lang bad ki syntiew kum ka dak ban ai burom ïa une u heh Congress.
