Shillong, Nohprah 03
U nongïalam ka Trinamool Congress (TMC), Bah George B. Lyngdoh u la ieh noh ïa ka kam kum u Vice-President ka seng bad President ka Umroi Block Committee.
U Bah Lyngdoh u la aiti ïa ka shithi ieh noh kam sha u President ka seng, Bah Charles Pyngrope da kaba kdew ba ka rai ban ieh noh ïa kitei ki kam ka dei namar ki daw shimet.
“Ki snem ba la leit noh jong ka jingïadei hapoh ka jingïalam jong phi ka la long ka jingïaid lynti ka ban sah kynmaw ha ryngkat ka jingmyntoi kaba khraw. Phi lem bad kiwei-kiwei ki nongïalam ba donburom phi la long ki nongkyrshan ïa nga bad kito kiba la pynshai barabor halor kumno ban pynkylla ïa ki jingeh sha ki kiei-kiei kiba lah ban long, bad ki mawjynthut sha ki lad ki lynti,” la ong u Bah Lyngdoh ha ka shithi.
Haba kylli la un pynïasoh noh sha kawei pat ka seng, u Bah Lyngdoh u la ong ba haduh mynta u dang dei hi u dkhot jong ka TMC.
Na ka liang u Bah Charles Pyngrope u la ong ba yn sa kyrpad ïa u Bah Lyngdoh ban tynrong lem ïa ka jingkitkhlieh sa shisien ynda u la pyndep ïa ki kam shimet jong u bad u lah ruh ban hap ïalam ïa ka seng kum u President.
“U la ieh noh ïa ka kam Vice-President hynrei u dang dei u dkhot jong ka seng. Um shym la bat ïa kano-kano ka kam namar ki kam shimet jong u,” la ong u Bah Pyngrope.
Haba kylli la ka don ka jingïakynad hapoh ka seng, u Bah Pyngrope u la ong, “Kam don eiei kaba kum kata. U (Bah Lyngdoh) la wan ïakynduh hi ïa nga ban kyrpad pyllait noh na ki kam kum u Vice-President, ym kum u dkhot jong ka seng.”
Haba kren halor katei ka jingïakynduh, u la bynrap, “Nga la ong ïa u ba ïa mynta ym lei-lei. Hynrei, lehse, ngan sa phah ïasnoh biang shen ïa phi. Phin tip shano, nga lah ban ong ruh ïa phi ban long kum u President.”
