Shillong, Nohprah 03
Ka Bharatiya Janata Party (BJP) kaba ïalam ïa ka jingsynshar ha ka Ri, ka la jop kput ha ka ilekshon sha ki Ïingdorbar Thawaiñ ha ki lai tylli ki jylla katba ka Congress kan ïoh ban synshar ha kawei na ki jylla.
Ka jingñiew ‘vote’ ha ki saw na ki san tylli ki jylla kiba la jied ïa ki nongthaw aiñ ka la long ha ka Sngi U Blei bad ka BJP ka la sar ïa ka jingjop ha Madhya Pradesh, Rajasthan bad Chhattis-garh katba ka Congress ka la jop ha Telangana.
Katkum ka jingpynbna na ka Election Commission of India (ECI), na ki 90 tylli ki konstitwensi kiba don ha jylla Chhattisgarh, ka BJP ka la jop lane ka dang tam ha ki 54 tylli katba ka Congress ha ki 35 tylli. Kawei na ki konstitwensi ka la leit sha ka seng GGP. Ka jylla Chhattisgarh ka dei kaba la synshar da ka seng Congress ha kine ki san snem ba la leit noh hadien ba ka la pynliem ïa ka BJP ha ka ilekshon ha u snem 2018.
Hynrei mynta ka kynti, ka BJP ka la lah ban ïoh biang ïa ka jingsynshar ha ka kti jong ka.
Ha jylla Rajasthan, kaba dei sa kawei pat ka jylla ba la synshar da ka Congress ha kine ki san snem, ka BJP ka la wan hakhmat duh da kaba jop lane tam haduh 115 tylli ki konstitwensi na ki 199 tylli. Ka Congress ka la wan ba ar ha kaba ka la jop lane tam ha ki 69 tylli ki konstitwensi. Ki don ruh sa 8 ngut ki kyrtong khlem seng kiba la jop lane dang tam katba kiwei ki seng ki la ïoh bynta lang ha ka jingjop.
Ha u snem 2018, dei ka seng BJP kaba la shah pynliem ha ka ilekshon ha ka seng Congress.
Haba phai sha ka jylla Madhya Pradesh, ka BJP ka la ïoh ban pynneh biang ïa ka jingsynshar ha kaba na ki 230 tylli ki konstitwensi, ka la jop lane dang tam ha ki 163 tylli katba ka Congress ka la wan ba ar da kaba jop ne tam ha ki 66 tylli.
Ha jylla Telangana kaba ju synshar da ka Bharat Rashtra Samithi (BRS) ha ki 10 snem ba la leit noh, ka Congress ka la ïoh ïa ka jingjop ha kaba na ki 119 tylli ki konstitwensi, ka Congress ka la jop ne dang tam ha ki 64 tylli katba ka BRS ka la wan ba ar da kaba jop ne dang tam ha ki 39 tylli ki konstitwensi.
Ka BJP ka la wan ha ka kyrdan kaba lai da kaba jop tang ha ki 8 tylli ki konstitwensi katba ka AMIM ka la ïoh jingjop ha ki 7 tylli ki konstitwensi.
Ka jingjop kput jong ka BJP ha kane ka ilekshon ka la wan katto-katne bnai shwa ka ilekshon MP Lok Sabha. Ka ilekshon sha kane ka Dorbar Bah jong ka Ri ka lah ban long ha u bnai Ïaïong-Jymmang 2024.
Ha ka Lah Sngi U Blei, ka ECI kan sa ñiew sa ïa ki ‘vote’ na ka bynta ki 40 tylli ki konstitwensi kiba don ha jylla Mizoram. Ha ka jingshisha, ka jingñiew ‘vote’ ha Mizoram ka la dei ban long mynta ka sngi hi, hynrei namar ka jingpyrshah jong kiba bun na ka daw ba ka dei ka Sngi U Blei, ka ECI ka la pynkynriah noh sha ka Lah Sngi U Blei.
