Shillong, Nohprah 03
Wat la ki kyrtong kham bun kiba pan tiket ki dei na ka United Democratic Party (UDP) ban ïakhun ïa ka ilekshon MP Lok Sabha, hynrei ka HSPDP kaba donlang ha kynhun Regional Democratic Alliance (RDA) kan sa shong ïa ka committee kaba kyrpang la shem taïew shwa ba ka UDP kan pynbna ïa u kyrtong.
Haba ïakren bad u General Secretary ka HSPDP, Bah Panbor Ryntathiang, u la ïathuh ba la shem taïew ka seng kan shong ïa ka committee kaba kyrpang ban ïakren ïa ka ilekshon MP ban rah ïa ki jingai jingmut sha ka UDP kaba don lang ha kynhun RDA shwa ban shim rai ïa u kyrtong.
U la ïathuh ba haduh mynta kiba pan tiket ki dei beit na ka UDP, hynrei u la ong ba ka UDP pat kam lah ban rai khlem ka jingïoh jingmynjur na ka HSPDP haba ki la ïatreilang ha ka RDA.
Nalor kata, u la ïathuh ha shwa ba ka UDP kan pynbna ïa u kyrtong ka hap ban pan jingmynjur na ka HSPDP khnang ba kin pan jingkyrshan lang na ki paidbah.
Namarkata, u don jingkyrmen ba dei tang kine ar tylli ki seng riewlum kiba lah ban shakri ïa ki paidbah ka jylla dei na kane ka daw ki kwah ban ïatreilang biang ha ka RDA.
Ha kajuh ka por u la ong ba ka seng kam kwah ban pynïeng kyrtong ha ilekshon MP, hynrei ka kwah ban ïaid ryngkat bad ka UDP ban pynkhlaiñ ïa ki seng riewlum hadien ba la bun ki seng na rithor.
Kumta sa shisien u don jingkyrmen ba u kyrtong ba pynïeng ka RDA un ïoh jingjop namar ka UDP ka don 12 ngut ki MLA bad HSPDP 2 ngut.
U la ong biang ba wat la ka HSPDP ka don 2 ngut ki MLA, hynrei ki don ki konstitwensi kiba rem khyndiat vote ha ka ilekshon MLA ba dang shu dep.
