Shillong, Nohprah 03
Ka surok Four Lane kaba ka sorkar ka la sdang pom nyngkong ïa ki diengkseh ha shi lynter ka surok na Umshyrpi shaduh Hynñiewmer, Upper Shillong ka la sahkut mynta la palat 2 snem kynthih. Ïa kane ka surok haduh mynta la shu ieh shrah naduh ba la dep tih.
Ka FKJGP Upper Shillong hapoh ka jingïalam u President, Bah Kit Nongphlang kan sa leit buddien biang na ka sorkar halor ka jingsahkut ka surok.
U Bah Nongphlang u la ong ba ka jingslem ban shna ïa ka surok saw lynti na Umshyrpi sha Hynñiewmer ka la buh jingeh ïa ki paidbah namar mynta lei ka jingdheng kali ka nang jur palat.
U la ong ba ka jingdheng kali ha Upper Shillong ka jur bha ha Sngi Nyngkong kaba la poi haduh Sanmer bad don ki por haduh Hynñiewmer.
U la ong ka jingdheng ka dei namar ka don tang ar lynti kaba ïaid na kajuh ka surok kawei ba hiar bad kawei ba kiew, hynrei lada don saw lynti ar laiñ kin kiew bad ar laiñ kin hiar kan pynduna ïa ka jingdheng kali.
ïa kane, u la ong ba ka jingslem ban shna ïa ka surok ka lah ban dei ba dang slem ban pynïaid ïa ki pipe um kiba wan na Mawphlang ha shi lynter jong ka surok.
Kum ban shu pynkynmaw, ka jingsahkut ban shna ïa ka surok ka dei naduh ba la pynsangeh ban pom ïa ki diengkseh ha Hynñiewmer ha pyrshah ba don ka shlem treikam shipai suiñ ha u Jylliew 2021 kaba la sdang dkhot ban pynsted ïa kane ka surok bud sa ka jingslem ban pynïaid ïa ki pipe um. Katba ka jingpom ïa ki diengkseh haduh Umshyrpi ka sorkar ka la dep lut.
