New Delhi, Nohprah 03
U Myntri Rangbahduh ka Ri, u Narendra Modi, ha ka miet Sngi U Blei u la maham tyngeh ïa ki seng kiba don ha ka liang pyrshah da kaba ong, “Kylla noh lym kymta ki paidbah kin weng ïa phi.”
Kane ka jingmaham ka la wan hadien ba ka BJP ka la jop ha ki lai tylli ki jylla – Rajasthan, Madhya Pradesh bad Chhattisgarh – ha ka ilekshon sha ka Ïingdorbar Thawaiñ kaba ka jingñiew ‘vote’ ka la long mynta ka sngi. Ha Telangana, ka Congress ka la wan hakhmat duh bad kan thaw ïa ka sorkar bathymmai.
Haba kynthoh halor kane ka jingjop ka BJP, u Modi u la ong ba kane ka la dei lypa ba ka BJP kan jop biang ha ka sien kaba lai ïa ka ilekshon MP Lok Sabha ka ban long ha u snem ban wan.
“Ka jingjop ba mynta ka sngi ka long ka ban sah kynmaw. Ka jingwanrah ïa ka roi ka par na ka bynta baroh, ka jingpyrta ban pynkiew arted ïa ka India, ka sur jong kiba shah ban beiñ ka la jop…ka jinglong hok bad jingsynshar ka bakhuid ki la jop,” la ong u Modi haba kren sha ki nongtrei bad nongkyrshan ka BJP ha ka shlem treikam ka seng ha New Delhi.
“Ki don kiba ong ba kane ka ‘hat-trick’ ka la pynthikna lypa ba ka BJP kan jop biang ha u snem 2024…Kane ka jingjop ka pyni ba ki paidbah kim ailad ïa ki kam bamsap bamngem lane ka jingsynshar tang da kawei ka longïing longsem,” u la bynrap.
Haba kynthah ïa ka Congress bad ka INDIA, kaba dei ka kynhun synrop jong ki seng kiba shong ha ka liang pyrshah, u Modi u la ong ba ka jingjop jong ka BJP ka dei ka ban ai jingsneng ïa ka Congress bad ka jinglong sarong jong kane ka kynhun synrop.
“Ka jingïakhun pyrshah ïa ki kam bamsap bamngem ka ïoh jingkyrshan bha…kito ki seng bad ki nongïalam ki bym don jinglehraiñ ban ïeng ha syndah ki briew kiba bamsap, ki la ïoh ïa ka jingmaham kaba jur na ki nongthep ‘vote’,” la ong u Modi.
“Ki paidbah jong ka Madhya Pradesh, Rajasthan, bad Chhattisgarh ki la pyni da ka jingieid ïa ka seng BJP. Wat ha Telangana, ka jingkyrshan ki paidbah ïa ka BJP ka la nang kiew,” u la ong.
