Shillong, Nohprah 03
Ka United Democratic Party (UDP) ka lah ban pynbna ïa ki kyrtong na bynta ka Shillong bad Tura Parliamentary konstitwensi hapoh jong une u bnai.
Ka jingïalang ïamir jingmut bad ki nongïa-lam na ki distrik bapher-bapher ka Ri-lum Khasi-Jaiñtia ka dang ïaid ban shim ïa ki jingpynsngew na ki haba ïadei bad ki 3 ngut kiba la pynpaw ïa ka jingkwah ban aireng na ka seng ha kane ka ilekshon MP ban wan ba kynthup ïa u President barim ka Hynñiewtrep Youth Council (HYC), Bah Robertjune Kharjahrin, President ka Khasi Authors’ Society (KAS), Dr. D.R.L. Nonglait bad MLA barim ka Mawlai, Bah P.T. Sawkmie.
Ha kajuh ka por, shen yn sa aiti ïa ka kaiphod sha ka State Election Committee (SEC), ka ban sa shim pat ïa ka rai kaba khatduh halor ka jingjied ïa ki kyrtong na bynta ka Shillong bad Tura Parliamentary konstitwensi.
U General Secretary ka UDP, Dr. Jemino Mawthoh u la ong ba ka jingïalang ïamir jingmut ka lah ban dep ha kane ka taïew ban wan.
“Ïa ka kaiphod jong ka jingïalang ïamir jingmut bad ki nongïalam na ki distrik bapher-bapher yn sa aiti sha ka SEC,” u la ong da kaba bynrap, “Ngim pat lah ban ong eiei halor kane ïa mynta, hynrei ka SEC kan sa khmih bniah ïa ki jingpynsngew jong ki nongïalam ka seng bad shim ïa ka rai.”
Haba kylli, u Dr. Mawthoh u la ong ba ka seng kan sa pynbna ïa ki kyrtong sha ka ilekshon Lok Sabha hapoh une u bnai. Utei u nongïalam u la ïathuh ruh ba hadien ka jingïalang jong ka SEC, ka seng kan sa rah ïa ka jingtyrwa ha ka jingïalang ka ban sa long shen bad ka Hill State People’s Democratic Party (HSPDP) hapoh jong ka Regional Democratic Alliance (RDA).
Shuh shuh u Dr. Mawthoh u la ong ba ka HSPDP ruh ka lah ban wanrah la ka jong ka jingtyrwa. Kine ar seng kin sa shong bad shim ka rai halor u kyrtong na bynta ka Shillong Parliamentary konstitwensi.
