Shillong, Nohprah 03
Wat lada ka jingpyntrei ïa ka skhim bylla 100 sngi lane Mahatma Gandhi National Rural Employment Guarantee Scheme (MGNREGS) ka long kaba ïaid bha ha kane ka Jylla, hynrei ka jingeh kaba dang don mynta ka dei ka jingbym pat treh lut ki nongbylla kiba la don jobcard ban pynïasoh bad u Aadhaar.
Ka tyllong khubor ka ïathuh ba na ki 8.8 lak ngut kiba dang don kyrteng kum ki nongtrei bylla hapoh ka skhim MGNREGS, kiba la pynïasoh bad u Aadhaar ki long 6.2 lak ngut, kaba mut 69.7% na ka 100.
“Kumba ka long mynta, ka Sorkar Jylla ka dang ïaid shakhmat ban poi sha ka thong ha kaba ka jingpynïasoh bad u Aadhaar ka dei ban long 100 na ka 100,” la ong ka tyllong khubor.
La ïathuh ba da kawei ka jingeh ka dei ka jingbym pdiang kiba don jobcard ban pynïasoh ïa u Aadhaar bad ka jaka kynshew pisa (bank account) jong ki.
La ïathuh ba ha ki Block ki bym don Bank lane ba don tang kawei ka Bank, la nang mih shuh ka jingeh namarba ka kham shimpor ban pyndep ïa ki kam khamtam ban pynïasoh bad ïa u Aadhaar bad ka jaka kynshew pisa.
La ong ba ki don ruh ki khep ha kaba ki phone nombar jong ki nongtrei bylla 100 sngi la pynkylla noh bad ki khlem pyndonkam shuh da ujuh. Kane ka la buh jingeh ha ka por ba pynrung kyrteng ban ïoh ïa u Aadhaar namar ym lah ban ïoh ïa u OTP nombar uba dei ban wan ka phone jong ki.
“Ngi dang don por ban pynrung bad pynïasoh Aadhaar lut ïa baroh kiba la don jobcard hapoh u Nohprah 2023,” la ong ka tyllong khubor.
Shuh shuh la ïathuh ba bun kiba don ka jobcard ki kloi ban ïatreilang lait noh tang katto-katne ngut kiba kiar ban leh Aadhaar.
“Ngi kyrmen ban poi sha ka thong lada kam dei 100 na ka 100 ruh, hynrei la kumno-kumno 90 na ka 100. Ngi lah ruh ban bteng biang ha u snem ban wan lada ym pat lah lut ban leh,” la bynrap ka tyllong khubor.
Haba kren shaphang ka jingsiew bainong kaba poi sha ka jaka kynshew pisa jong kito kiba don jobcard, la ong ba da ka jingpyntreikam ïa ka Aadhaar Bridge Payment System (ABPS), ka jingsiew bainong sha ki nongbylla skhim 100 sngi kan nym treikam lada ym pynïasoh Aadhaar bad ki jaka kynshew pisa.
Halor ki nongbylla ki bym treh shuh ban trei bylla hapoh ka skhim 100 sngi namar u Aadhaar, la ong ba la pyrshang ban pynsngewthuh ïa ki khamtam na ka bynta ka rukom treikam kaba khuid kaba shai bad jingmyntoi jong ki namar ka jingdonkam ban siew bainong sha ki jaka kynshew pisa da kaba pynïasoh bad u Aadhaar.
