Shillong Nohprah 03
Ka Tnat Pynroi Sor ka Sorkar Jylla ka la phah ïit bniah khnang ban tip ïa ka rukom pyllang bad lum ïa ki jaboh jabaiñ ha la ïing bad ka rukom pyllait um jaboh na ïing briew khnang ban lah shim ïa ki sienjam kiba lah ban pynbha khamtam ban wanrah ïa ki buit kumno ban pynkhuid ïa ka um jaboh ha shwa ban pyntuid sha nala bad sha ki wah.
Ïa kane ka jingïit bniah la bynshet ha ka Infinite Solution, ka kynhun kaba na kane ka nongbah ha kaba la pyndonkam lyngba ka mobile app ban lum jingtip na ki longïing naduh ka jingpynïakhlad lypa ïa ki jaboh na la ïing hashwa ban ai sha ki kali kit jaboh bad ruh ïa ka rukom pyllait um jaboh kaba mih na ïing bad pyntuid shabar.
Ïa kane ka jingïit bniah la sdang da ki kynhun jong ka Infinite Solution naduh ka 15 tarik Naiwieng, 2023 bad ka thong ka long ban pyndep hapoh lai bnai.
Ki shnong bad ki dong kiba hap ha ka jingpeit ka Shillong Municipal Board ki ïatreilang bad ki kynhun ha kaba ai jingtip lyngba ki mobile app.
La ong ba ki don kumba 60 ngut ki Surveyor bad 10 ngut ki dkhot kiba don nadien ban kyrshan ïa ki kynhun kiba leit sha madan ban pyndep ïa ki kam.
La ong ba kane ka sienjam ka dei ruh na ka bynta ban pynbha ïa ki sawdong sawkun ha kane ka nongbah bad ban bud ïa ki kyndon ka NGT haba ïadei bad ka jingsumar ïa ka rukom bret ïa ki jaboh bad pyllait ïa ka um jaboh kaba mih na ïing shabar.
Ka jingthmu ruh ka long ban khanglad ïa ka jingtuid ka um jaboh lyngba ki nala sha ki wah ha kane ka nongbah khamtam ka Wah Umkhrah bad Umshyrpi kiba la jaboh shaba palat namar ka jingbym sumar ki nongshong shnong.
