Shillong, Naiwieng 03
Ka Sorkar Jylla lyngba ka tnat pule puthi ka dang jingthmu ban phah ïa ki nonghikai skul sa kumba 18 hajar ngut kiba dang dei ban shah hikai pyntbit. Ïa kine ka Sorkar ka thmu ban phah pyndep ïa ka Diploma in Elementary Education (D.El. Ed) lyngba ka open and distance learning jong ka National Institute for Open Schooling, tangba ka Supreme Court ka la pynmih ïa ka hukum ba kito kiba pyndep ïa ka D.El.Ed kim pat long kiba bit ban thep kam nonghikai.
U Myntri ka tnat pule puthi, u Rakkam A Sangma u la ong ba ha Jylla Meghalaya ki dang don sa kumba 18 hajar ngut ki nonghikai skul kim pat pyndep ïa ka jingshah hikai pyntbit bad ïa kine yn sa thaw lad ban ïoh phah ïa ki sha ki jaka ai jinghikai pyntbit.
Ha ka jingshisha, ka tnat pule puthi ka dang thmu ban thoh shithi noh sha ka NIOS na ka bynta ban pyndep ïa ka jingai jinghikai ïa ki nonghikai ki bym pat shah hikai pyntbit. Pynban na ka liang ka Supreme Court ka la pynmih noh ïa ka rai ban nym ithuh shuh ïa kiba la pyndep ïa D.El.Ed lyngba ka NIOS bad kim lah shuh ban leit thep kam ban long nonghikai.
U Rakkam u la ong ba ïa mynta ym pat lah ban pynbeit hynrei ka Sorkar Jylla kan sa shim ki sienjam kumno ban ïoh phah ïa ki nonghikai ki bym pat pyndep ïa ka jingshah hikai pyntbit namar ki hap ban pyndep ïa ka jingshah hikai katkum ki kyndon.
Ha ki snem ba la leit, ki la don palat 20 hajar ngut na Meghalaya kiba la pyndep ïa ka D.El.Ed kaba pynlong da ka NIOS bad ki don ruh kiba la pyndep ïa ka D.El.Ed kiba la ïoh kam nonghikai. Kiba bun na Meghalaya ki la pyndep ïa ka D.El.Ed lyngba ka NIOS ha u snem 2014-2015.
