Shillong, Nohprah 04
U Myntri Rangbah ka jylla u Conrad K Sangma ha ka Lah Sngi U Blei u la ai khublei ïa ka seng Bharatiya Janata Party (BJP) kaba la ïoh jingjop ha lai tylli ki jylla, kita ha Madhya Pradesh, Rajasthan bad Chattisgarh ha kane ka ilekshon MLA kaba dang shu dep.
Lah ban pynkynmaw ba ha ka jingpynbna risol ha ka Sngi U Blei, ka BJP ka la ïoh ka jingjop kaba heh ha Madhya Pradesh bad Rajasthan bad khamtam lei ban jop ruh ha Chattisgarh, kaba kam shym la poi pyrkhat ban jop suk. Katba ka Congress pat ka la jop tang ha Telangana.
Haba kren sha ki lad pathai khubor, u Conrad u la ong, “Ka jingkyndit kaba khraw eh ka dei halor ka jingjop kaba la wan na ka jylla Madhya Pradesh. Nga ai khublei ïa u Shivraj Singh Chauhan namar wat hadien ba u la don ha ka sorkar la bun bun snem hynrei u la lah ban kham leh bha shuh shuh ban pynïoh ïa ka jingjop kaba heh wat hapdeng kiba bun ki jingeh.”
U Conrad u la ai khublei kyrpang ruh ïa u President ka BJP Sengkmie u JP Nadda halor ka jinglah ban leh bha ka seng jong u ha kine ki lai tylli ki jylla kiba ka la ïoh jingjop.
