Shillong, Nohprah:
Ka jylla Meghalaya kumba ka la paw halor ka jingdon jong ki jaka bam bapher bapher khamtam ha kane ka juk kaba mynta la sakhi biang ïa kawei na ki dukan bam ba thymmai ïa kaba la tip kum ka ‘Mountain Whisper’ kaba don ha RR Colony Rynjah.
Ïa katei ka dukan bam la plie paidbah ha ka 2 tarik u bnai Nohprah 2023 bad katei ka dukan bam ka dei kaba don ïa ki jingbam kiba har rukom.
Ïa katei ka dukan la long trai da u Faiz Khan bad ka dei kaba don harud surok hajan ka jingkieng Umpling.
Ha ka jingïalang ba lyngkot hashwa ban plie paidbah ïa katei ka dukan, la ïadonlang ki riew rangbah ha ryngkat ki bahaïing bahasem, ki paralok parajor kiba la wan ban ai mynsiem bad pynshlur ïa ki samla ban seng kam lajong.
Khyndiat shaphang ka jingsngewtynnad jong u Faiz Khan bad kaei kaba pynlong ïa u ban plie ïa katei ka dukan ha ryngkat ki jingbam kibba bun jait, ka dei ha u snem 2022 hadien jong ka jingkhangdam bad namar ba u long u briew u ba sngewtynnad ban leh ïa ki laitylli ki jait kam ne ki bynta ha ka jingim bad kita ki long ki long ka bam, ki sur jingrwai bad ka koit ka khiah kumta u la pyrkhat ban plie ïa kane ka dukan kaba long ka lad bad ka bynta îa ki briew ba kin wan ban mad ïa ki jingbam bad ruh ban sngap ïa ki jingrwai.
Ïa u Faiz Khan la kha ha Shillong bad ki kmie ki kpa bad ki paieid meiieid jong u ruh ki dei kiba la wan shong shnong naduh ki por kiba mynshwa.
Hadien ba u la im ïa ka jingim shabar ka jylla, u la pyrkhat ban lum ïa ki tum ki tam ban wanphai biang sha Shillong na ka bynta ban seng kam lade kaba long kawei na ki kam kiba u ju sngewtynnad eh.
Shuh shuh ha kane ka sngi la don ruh ka kynhun tem ïa kaba la tip kum ka ‘Retrosage’ kaba la pynbyrngia ïa ki paidbah ba wan bam lyngba ki sur jingrwai.
