Nongstoiñ, Nohprah:
Ka jingdon ka mynsiem sngewlem ban kner ïa ki jingïarap ka long kawei ka bynta kaba kongsan ha ka imlang ka sahlang bad lehse kan long ruh ka nuksa ïa kiba bun balang.
Ha ka jingbteng ïa ki kam trei sngewbha, ka 4th BN MLP Sohpian, West Khasi Hills ha kum kane ka por sngewbha jong ka jingnang ka jingjan ka jingwan ka sngi Khristmas mynta u snem, ha ka jingïalam jong u Bah Lakador Syiem, MPS uba long u Commandant jong ka 4th BN MLP Sohpian, ha ka sngi Thohdieng ka taïew ka la ïoh ban kner ïa ki jingïarap da kaba ai sngewbha da ki kymbor (blanket) sha ki nongshong shnong ka shnong Nongsohpian ha West Khasi Hills.
Kiba la ïoh jingai sngewbha ha kane ka sngi ki la kot sha ka 150 ngut ki nongshong shnong, kiba shong ba sah hajan jong ka BN HQs Sohpian, kaba la long shisha ka jingkyrkhu kaba khraw na ka bynta kine ki longïing kiba la ïoh pdiang ki jingïarap.
Shuh shuh ïa kine ki kombor la wan ai sngewbha da ki riew shimet jong ka 4th BN MLP Sohpian ryngkat ki paralok jong katei ka Battalion.
La ïathuh ruh ba kane ka prokram ban sam kombor jong ka 4th BN MLP Sohpian, kan sa bteng ruh sa sha 10 tylli ki jaka bad ki shnong bad kumba 1200 eiei ki nongshong shnong kiba don sawdong jong ka BNHQs Sohpian ha kine ki thaiñ kin sa ïoh jingmyntoi ha ki khyndiat sngi ban sa wan.
Na ka liang ka 4th BN MLP Sohpian, ka phah ruh ka jingai khublei ïa baroh da kaba ong “Khublei Khristmas bad Snem Thymmai (Christmas bad New Year) ïa baroh.”
