Shillong, Nohprah:
Ka Khasi Students’ Union (KSU) Laban Circle ha ka sngi Saitjaiñ ka la ïoh ban pynlong ïa ka Free Medical Camp ne ka jingai jingsumar ei ha Kynjat Phutbol kaba la long shisha ka jingmyntoi kaba khraw na ka bynta ki nongshong shnong.
Ha kane ka sngi, haduh 198 ngut ki briew kiba kynthup naduh ki khyllung, ki longkmie bad rangbah kiba la ïoh ka jingsumar ei bad ban phah peit ïa la ki jingpang.
Ki doktor kiba ïadon ryngkat ha kane ka sngi ki kynthup ïa ka Dr. L Rynjah na Laban Dispensary, Dr. BR Garod na Lumparing UPHC, Dr. K Nongbri (Pediatrics) na Children Hospital, Dr. A Dkhar (ENT) na Robert Hospital, Dr. T Syngkon bad Dr. A Lyngdoh (Dentist) na Titanium Dental Health Care bad ki doktor napoh Bansara Eye Clinic.
Ha kane ka sngi la don ryngkat lang ruh ki Lab Assistant na ka Dr. Lal Path Labs kiba la ïarap ban test shini (diabetes), cholesterol, thyroid, uric acid bad kiwei kiwei ki test kiba ki paidbah ki donkam.
Ka seng ka pynpaw ïa ka jingsngewnguh kaba khraw ïa baroh ki doktor, ki nurse, asha, pharmacist, lab technician, ANM, DEO kiba la ïadon ryngkat ha kane ka sngi ban ai ïa ka jingshakri kaba pura sha ki paradoh parasnam ha kaba ïadei bad ka koit ka khiah.
