Shillong, Nohprah:
Ka State Disaster Response Force (SDRF) ha ka Sngi Saitjaiñ ka la leit bran-bran ban kner ïa ka jingïarap sha ka jingjia pluh ding jong kawei ka kudam marbam kaba don ha Garikhana, Shillong.
Katei ka jingjia ka la jia ha ka por shiteng synñia jong ka Sngi Saitjaiñ.
Ka State Disaster Management Authority (SDMA) ka la kynjoh sha ka SDRF ha ka por kumba 02:00 baje hynne mynstep ban leh ïa kaba donkam haba ïadei bad katei ka jingpluh ding ha ryngkat ka jingïasnohktilang bad ka tnad Fire & Emergency Services kaba la don lypa ha katei ka jaka.
Kumba ka long, 2 tylli ki kynhun jong ka State Disaster Response Force (SDRF) hapoh ka jingïalam u Bah P.H. Khongsngi, Commandant, SDRF bad Bah B. Sahkhar, 2nd-in-Command, SDRF ki la leit sha katei ka jaka.
Ka SDRF ka la pyndep ïa ka jingshakri ba 10 kynta jong ka haduh 12:40 baje mynsngi tad ynda la lip syndon ka ding lyngba ka jingtrei shitom lang jong baroh ki kynhun kiba ïadon bynta ban tem ïa ka ding kaba klang.
Ha katei ka jingpluh ding ym shym la don kano-kano ka jingjia ba sngewsih. Kane ka long ka kyrwoh na u Divisional Commandant of Home Guards, Shillong PRO, Directorate of Civil Defence & Home Guards, Meghalaya, Shillong, Bah P.H. Shylla.
