Aizawl, Nohprah 04 (UNI)
Ha ka ilekshon ka ban sah kynmaw, ka Zoram People’s Movement (ZPM), kaba dei ka seng kaba dang thymmai ha Mizoram, ka la pynkhyllem ïa ka seng Mizo National Front (MNF) bad ïa u Myntri Rangbah, Zoramthanga.
Kane ka seng ka la jop ha ki 27 na ki 40 tylli ki konstitwensi ha ka jingñiew ‘vote’ kaba la long ha ka Lah Sngi U Blei. Ka MNF, kaba la synshar 10 snem kynthih, ka la jop sa tang ha ki 10 tylli ki konstitwensi. Ka BJP ka la wan ba lai da kaba jop ha ki artylli ki konstitwensi katba ka Congress, kaba la ju synshar ïa ka Mizoram da ki bun phew snem, ka la jop tang ha kawei ka konstitwensi.
Ka ZPM, kaba dang mih ha u snem 2017, ka la mad ïa ka jingjop badonburom dang ha ka sien kaba ar ba ka la ïashim bynta ha ka ilekshon ha Mizoram. Baroh shi katta, ïa ka jingsynshar ha Mizoram la ju ïa kylliang hapdeng ka Congress bad ka MNF. Hynrei ha kane ka kynti, ka jingkylla ka la wan.
Ha kane ka ilekshon, u Myntri Rangbah ka Mizoram, u Zoramthanga, u la shah rem na Aizawl East-1 ha u kyrtong ka seng ZPM bad u MLA barim, u Lalthansanga, da 2,101 ‘vote’. U Symbud Myntri Rangbah, u Tawnluia, u la shah rem na Tuichang konstitwensi ha u kyrtong ka ZPM, u W Chhuanawma.
Ki heh ka seng Congress kum u Zodintluanga bad u Nihar Kanti Chakma, kiba dei ruh ki Myntri sorkar barim, ki la shah rem na Thorang bad West Tuipui konstitwensi. Wat u President ka seng Congress ha Mizoram, u Lalsawta, u la shah rem na Aizawl West-III da kaba shah pynliem ha u kyrtong ka ZPM bad MLA, u V L Zaithanzama.
Hynrei u Myntri sorkar na ka seng MNF, u Robert Romawia Royte, u la jop na Hachhek konstitwensi. Kiwei pat kiba la shah jied na ka seng MNF ki long u Lalchhandama Ralte, R Rohmingliana, Pravo Chakma, bad Shanti Jiban Chakma.
U nongïalam ka seng ZPM bad uba la khreh ban shimti kum u Myntri Rangbah bathymmai, u Lalduhoma, u la jop biang na Serchhip. U rangïalehkai kynjatbol ba pawkhmat ha ki por mynshwa, u Jeje Lalpekhlua u la jop na South Tuipui da kaba pynliem ïa u nongïalam ba radbah ka MNF, u Dr R Lalthangliana.
Kane ka ilekshon ha Mizoram ka la thaw ‘history’ ruh namar ka jingshah jied jong lai ngut ki ‘riew kynthei kum ki MLA. Kine ki kynthup ïa ka kyrtong ka ZPM na Aizawl South-III, ka Baryl Vanneihsangi Tlau, ka Lalrinpuii na ka seng ZPM na Lunglei East, bad ka kyrtong ka MNF na West Tuipui, ka Pravo Chakma.
