Shillong, Nohprah:
Ka kylla ba 3 jong ka ‘Meghalaya Farmers’ Parliament’ kan long ha ka 4 bad 5 tarik mynta u bnai, kaba hap lang ha ka sngi rakhe ïa ka ‘Meghalaya Farmers’ Day’ ha State Convention Centre, Shillong.
Ïa kane ka dorbar yn pynlong da ka tnad ka rep ka riang ha ryngkat ka jingïasnohktilang bad ka Meghalaya Basin Management Agency (MBDA) bad ka Hills Farmers’ Union (HFU).
Kane ka dorbar ba man u snem ka la long ka jingrakhe kaba kongsan – kaba ithuh ruh ïa ka jingminot bad jingsynñiang jong ki nongrep ha ka ban pynwandur ïa ka jinglong-jingman ka rep ka riang hapoh ka Jylla.
Ki heh ki haiñ ki ban ïashim bynta ha kane ka dorbar bah ki nongrep kin kynthup ïa u Myntri Rangbah ka Jylla, u Conrad K. Sangma, u ban long kum u kongsan ha ka jingïadonlang Myntri ka tnad Animal Husbandry & Veterinary, Bah A.L. Hek bad ka Myntri ka tnad ka rep ka riang, Dr. Mazel Ampareen Lyngdoh.
“Katba ngi dang ïalum na bynta ka ‘Meghalaya Farmers’ Parliament’ bad ka ‘Farmers’ Day’, ka long ka jingai burom ïa ka nongrim ba skhem jong ki nongrep jong ngi. Ka jingtrei shitom jong ki ka wanrah ïa ki khana bad ki jingshem thymmai bapher-bapher. Ha kane ka dorbar, ngi ïohi ïa ka lawei ha kaba ki rukom treikam ki ban neh bad ki sienjam ki bym don jingktah kin plie lynti na bynta ka rep ka riang kaba paka,” ong u Commissioner & Secretary, ka tnad ka rep ka riang, Dr. Vijay Kumar D, IAS.
U la ong ruh, “To ngin rep ym tang ki jingthung, hynrei ban ieh shadien ïa ka jingshemphang bad ka jingriewspah. Ryngkat lang ngin rakhe pyndonburom ïa ki nongrep kiba kynthup ïa ka nongrim jong ka jinglong-jingman ka rep ka riang ka Meghalaya na bynta ka jingminot bad ka jingïohi jngai ïa ka lawei kaba dap kyrhai.”
Ka ‘Farmers’ Parliament’ kaba nyngkong ka la long ha ka 4 tarik Nohprah, 2018, ha Shillong ha ryngkat la jingïasnohktilang bad ka tnad ka rep ka riang, Meghalaya Basin Development Agency (MBDA), Meghalaya Institute of Entrepreneurship (MIE), bad ka Hills Farmers’ Union (HFU).
Hadien kane, ka kylla ba-ar jong ka dorbar ka la long ha ka 10 tarik Nohprah, 2019, ha Tura, da kaba pynbna ruh ïa u snem 2020 kum u snem jong ki nongrep ne ka “Year of the Farmers”, katba ïa ka 4 tarik Nohprah la rai ban rakhe beit noh ïa ka ‘Meghalaya Farmers’ Day’ man la u snem.
Ha kane ka dorbar, yn ïashim bynta lang ruh da ki ‘riewshemphang ha ka rep ka riang ki ban tyrwa ïa ki jingai jingmut jong ki ban khmih ïa ki jingdonkam jong ka tnad ka rep ka riang.
Shuh shuh ka ‘Meghalaya Farmers’ Parliament’ kan ïaineh ha ka nongrim jong ka – ban kyntiew ïa ka rep ka riang kaba neh da kaba pynneh-pynsah ïa ka rukom rep tynrai kumjuh ban kdup ïa ki sienjam bathymmai ki ban khmih ïa ka jinglong-jingman bad jingkylla ha ka tnad ka rep ka riang.
