Shillong, Nohprah 04
Ka jingïaleh ‘stunt’ da ki kali ne ki thuk-thuk ar shaka hapoh ki shnong ki thaw la ka long ha ka por mynsngi mynshai lane mynmiet mynïong, ka ju buh jingma ym tang ïa kito kiba ju leh ïa kitei ki ‘stunt’ hynrei wat ïa ki paidbah nongïaid
nongïeng ruh kumjuh. Kane ka kam khyllah ha kajuh ka por ka pynjulor ïa ki jingtei sahnam bad jingtei ka sorkar bad riewshimet kum kynroh, ki jingbuh pynitynnad bad kiwei kiwei.
Wat la na ka liang ki Dorbar Shnong ki ju buh ka jingmaham kaba tyngeh ïa kino-kino ki briew kiba ju wan ban leh ‘stunt’ hapoh ki shnong ba kim bit satia ban leh ïa kum kitei ki jait kam hapoh ka shnong hynrei la ïohi pat ba ki don hi katto katne kiba ju ïaleh pyrshah.
Ha ki khyndiat sngi kiba la dep ka la don kawei ka ‘video’ lane ka dur khih kaba la saphriang kylleng kylleng ha kaba la ïohi ba kawei ka kali Maruti 800 ka la leh ‘stunt’ ha ki bynta jong ka shnong Laitumkhrah. Hapdeng katei ka jingleh ‘stunt’, katei ka kali ka la leit ban tynrah ïa ka jaka kaba la buh pynitynnad bad kaba dei ruh ka jaka kaba ju pynïaphiah ïa ki kali kiba wan na ki bynta ba shaneng bad sharum.
Wat la ha katei ka por ym shym la don satia mano mano kiba ïaid ba ïeng ha katei ka surok namar ba ka dei ha ka por step phyrngab hynrei lada jia ba kum ha katei ka por lada don ki briew kiba mih na ïing ban leit sha ki kam ka jam, hato kaei ka ban jia ïa ki?
La ïohi ba bunsien kum kine ki jingïaleh ‘stunt’ la ju leh ha ki thaiñ ka surok Laitumkhrah.
Haba ïoh ban ïakren bad u Bah Andrew A. Jyrwa uba dei u Rangbah Shnong ka Laitumkhrah Dorbar Shnong Pyllun, u la ïathuh ba hadien katei ka jingsaphriang jong katei ka dur khih, ki la bun bha ki briew kiba la phone ïa u ban kylli ba kumno bad kaei ba ka Dorbar Shnong ka don ban ong halor katei ka jingleh.
U Bah Jyrwa u la ong ba kum ka Dorbar Shnong kan sa shim da ki sienjam kiba tyngeh ban ym ailad ba kum kitei ki jingjia kin wan jia hapoh ka shnong. Kum ka shnong lada ka lap ïa kino kino ki khynnah kiba ju mlien ban wan leh ‘stunt’ hapoh ka shnong, na ka liang ka shnong kan sa wad ïa kitei ki briew kan sa pynngat ïa ki hapoh ki kyndon aiñ kiba tyngeh.
“Ngi la shimkhia mar-mar ïa katei ka kam, ngi la don ka jingïakren, ka jingïaphylliew jingmut bad kaba kham kongsan ka la don ka jingbuddien lang ryngkat bad ka tnad pulit ba ngin ïoh ban ithuh bad ba ngin shim ka sienjam halor ka jingleh jong kito ki khynnah namar ba kum kito ki rukom leh ‘stunt’ ka long beaiñ ha ka ri India jong ngi baroh kawei ban leh ha ki surok shnong”, la ong u Bah Jyrwa.
U Bah Jyrwa u la ong ruh ba katkum katei ka dur khih ba la ïohi, ka la pyndik shikatdei eh ïa ka shnong bad kum ka shnong ka la shim da ki sienjam khnang ban pyntikna ba kum kine ki jingïaleh ‘stunt’ hapoh ki surok shnong kin nym dei shuh ban jia hapoh ka shnong Laitumkhrah.
U Bah Jyrwa u la ïathuh ba ki don shibun tylli ki jingujor na ki nongshong shnong ha kaba ïadei bad ka jingïaleh ‘stunt’ jong ki khynnah hapoh ka shnong bad u la ïathuh ruh ba ha ki snem kiba la dep ki la don ki jingjia kiba sngewsih haduh ban da duh syndon ïa ka jingim briew tang namar ka jingïaleh ‘stunt’ hapoh katei ka shnong.
“Hadien kato ka jingjia, na ka liang ka shnong bad ka tnad pulit ki la buddien bad ki la kham duna bha kiba ïaleh ‘stunt’ hynrei kaei kaba kham jynjar ïa ngi ba ngin buddien hangne ka long namar ba kine ki khynnah kiba leh ïa kine ki ‘stunt’, kim leh ha ka por ba ki briew ki dang ïaid dang ïeng hynrei ki la ïaleh ha ka por ba la kynjah bha”, la ong u Bah Jyrwa.
Shuh shuh u Bah Jyrwa u la ong ba ka shnong Laitumkhrah ka dei ka shnong kaba shongsuk shongsaiñ bad kumta kam sngewtynnad ba kino kino ki briew kin wan leh ïa kum kitei ki jait kam hapoh ka shnong.
Namar kata, u Bah Jyrwa u la maham da kaba tyngeh ruh ba kino-kino kiba sngew ba ki lah ban wan shapoh ka shnong Laitumkhrah bad ba kin leh katba ki mon kata kan dei ka jingbakla jong ki.
“Ka jingkyntu bad ka jingmaham na ka liang ka shnong ka long kaba shai kdar ba lada phi sngew ba phi lah ban wan shapoh ka shnong Laitumkhrah bad ba phin leh katba phi mon, kan dei ka jingbakla jong phi, kam mut ba ngin sngap bad lada ngi lap ngin pynshitom katkum ka kyndon jong ka aiñ”, la pynkut u Bah Jyrwa.
