Shillong, Nohprah 04
Ki nongïalam ka BJP ha Meghalaya ki la mih ban shad kmen kum ka dak jong ka jingkmen namar ka jingïoh jingjop ka seng ha ki lai tylli ki Jylla kiba la pynlong ïa ka ilekshon MLA ha kaba u Myntri Sorkar, u Bah A.L Hek lem bad kiwei ki nongkitkam bad ki dkhot ki la mih ha surok hakhmat ka shlem treikam jong ka seng ha nongbah Shillong ban kaweh lama bad thang bom bula ha ka Lah Sngi U Blei.
Ha ryngkat ka jingpyrta ïa ka sur ïaroh ïa ka BJP bad ka jingpyrta “im slem mei India,” ki nongïalam ka BJP ki la rah ïa ka lama jong ka seng ha kti bad kaweh sahuh namar ka jingjop ka seng ha ka ilekshon MLA ha Rajasthan, Madhya Pradesh bad Chattisgarh khamtam hashwa ban poi ka ilekshon MP Lok Sabha ha baroh kawei ka ri.
Haba kren ha kane ka sngi, u Bah Hek u la kob ba ka BJP kan sar naphang ha kane ka ilekshon MP Lok Sabha ka ban sa long ha baroh kawei ka ri ha u snem ban wan.
U la ong ba ka BJP ka la nang kiew ka jingïoh vote bad MLA kum ha Telangana bad ha Mizoram ruh kumjuh ha kane ka ilekshon MLA kaba la pynlong ha ki 5 tylli ki Jylla. Kumta u la ong ba ha Meghalaya ruh ka BJP kan nang ïoh jingjop da ka jingtrei borbah jong baroh ki nongkitkam bad ki dkhot ka BJP.
Haba ïadei bad ka jingjied kyrtong ban ïakhun ha ka ilekshon MP Lok Sabha na Shillong bad Tura, u Bah Hek u la ong ba ka bhah na ka bynta ki kynthei ka la don lypa 33 na ka 100, bad lada long kaba lah donkam ban ïoh da ki kyrtong kiba dei ki kynthei ha kine ki ar tylli ki konstitwensi.
U la ong ba ma u um dei u kyrtong namar ka jingjied ka shong ha ka seng bad ki nongïalam tangba lada ïoh da ki kyrtong kiba dei ki kynthei ka long kaba biang eh ban ïakhun bad ïoh jingjop ha ka ilekshon MP ka ban wan.
