Mawkyrwat, Nohprah 04
Uwei u samla uba dang 17 snem ka rta na ka shnong Nonglang ha South West Khasi Hills District u la duh ei noh ïa la ka jong ka jingim katba uwei pat u la mynsaw hadien ba ka thuk-thuk (Bike) kaba ki shong ka la leit tynrah ïa kawei ka kali Alto ha Saitsnad, Mawlangwir hajan ka Rowell Lyngdoh Stadium.
Ïa une u samla uba la khlad noh la tip kyrteng kum u Nangpynwadbor Kharlyngdoh katba uba mynsaw pat u dei uba la tip kyrteng kum u Badatipskhem Snaitang ba dang 17 snem. Kine baroh arngut ki dei na ka shnong Nonglang ha South West Khasi Hills District.
Katkum ka tyllong khubor na ki pulit la ïathuh ba katei ka jingjia ka la jia ha ka janmiet jong ka 3 tarik u Nohprah 2023 ha ka por kumba 4:15 eiei katba kawei ka thuk-thuk (KTM) kaba don ïa u number AS01-MB-5259 kaba la ñiah da u Nangpyndapbor Kharlyngdoh ryngkat u paralok jong u ki dang wan na Mawkyrwat ban leit sha Nonglang. Ynda ki la poi ha kawei ka jaka hajan Rowell Lyngdoh Stadium Mawlangwir katei ka thuk-thuk kaba ki shong ka la leit tur beit sha kawei ka kali Alto kaba don ïa u number ML12-1474.
Shuh shuh ki tyllong khubor na ki pulit ki la ïathuh ruh ba ïa katei ka kali Alto la ñiah da u Dirling Kharlyngdoh uba dei na kajuh ka shnong na Nonglang. La ong ba u Bah Dirling katba u dang mut ban phai ïa ka kali, kyndit-kynsan ka thuk-thuk ka la wan tur bad ha katei ka jingjia u Nangpyndapbor Kharlyngdoh uba dei u nongñiah jong ka thuk-thuk u la khlad ha shen katba u Badatipskhem Snaitang uba la mynsaw, la pynkit noh wut-wut sha CHC Mawkyrwat ban pynïoh ïa ka jingsumar.
