Jowai, Nohprah:
Ka District Planning Officer, West Jaiñtia Hills ryngkat ka jingïatreilang ki tnad treikam Sorkar bad ki kynhun treimon sngewbha (NGO) ki la pynlong ïa ka ‘Winter Camp’ ba lai sngi lynter kaba tip kum ka “Spectrum of Life” ïa kaba la pynlong halor ka phang “The future is yours”.
Ha kane ka program palat 200 ngut ki khynnah skul na kylleng ka West Jaiñtia ki la wan ban ïashim bynta.
La jied mar 5 ngut ki khynnah skul na ki 40 tylli ki skul kiba don ha sor bad khap sor ban ïashim bynta ha kane ka ‘Camp’.
Ïa kane ka ‘Camp’ la pynlong ha phyllaw ka North East Adventist University, Khliehtyrshi naduh ka 29 tarik Naiwieng haduh 1 tarik Nohprah.
Ha ka jingïalang plie la donlang u Bah Wailadmiki Shylla, MLA, u Bah Silvester Phanbuh MCS, u Bah F.B. Basan, DPO bad ka Kong B. Blah, ADC, kaba dei ka Election Officer West Jaiñtia Hills District.
Hadien ka jingïalang ka la don ka sa ka bynta ha kaba la pynïaid da u Dr. H.H. Mohrmen bad Niwanka Shylla, dkhot ka Society for Urban and Rural Empowerment (SURE), Jowai.
Kum shi bynta jong kane ka ‘Camp’, la pynlong ruh ïa ka jingïaid kjat na NEAU Campus sha pung Thadlaskeiñ da kaba khar ñiut lynter lynti.
Ha pung, u Dr. Mohrmen u la ïathuh ïa ki samla shaphang ka khana u Sajar Nangli bad ka khana shaphang ka pung Thadlaskeiñ.
Ha ka por mynstep la pynlong ïa ka ‘Zumba’ bad ‘Yoga’ ha ka jingdonlang ki dkhot ka Bharat Scouts and Guides. Kiwei de ki jingïalang la pynlong halor ka ‘Social Media’ kumno ban pyndonkam ban lait na ka jingshah shim kabu.
U Daniel L. Gatphoh uwei na ki nongring dur ba paw ka sor Jowai u la ïathuh ïa ka jingïaid lynti jong u ha ka kam ringdur bad ai mynsiem bad pynshlur ïa ki khynnah.
Nalorkata la wan ïashim bynta ruh da ki dkhot ka Chi Ïung, ka Kong Simi Kongthiang, nongshna phlim, ka Irene Dkhar Miss Meghalaya bad Miss North East, u Bah Eugene Lyngdoh rangialehkai phutbol ba paw ka Jylla bad kiwei-kiwei.
Ha ka sngi pynkut na ka liang ka ïing treikam jong u District Skill Development Officer ka la pyni ïa ka ‘Skill Training’ kaba la pyndep da kaba rah ruh ïa ki tiar ba ki la dep shna bad pynmih.
