Shillong, Nohprah 04
Ka long kaei-kaei kaba kham pher bad kham ñiar ba ki khynnah kin don la kajong ka Dorbar ban ïatai ïa ki mat kiba donkam ha ka imlang sahlang bad ruh ban jied ïa ki nongkitkam ka Dorbar Khynnah kiba ïakit ïabah ha shnong ha thaw. Hynrei kum kane ka Dorbar Khynnah ka don ha ki katto katne ki shnong bad kine ki Dorbar Khynnah ki treikam ban hikai ïa ka jingkordor ka khuid ka suba.
Kum kane ka Dorbar Khynnah kaba da don la kijong ki nongkitkam, ka don ha shnong Mawlatbah kaba hap ha Block Mawkynrew, East Khasi Hills district. Ïa kane ka Dorbar Khynnah la sdang ha kane ka shnong ha ka 22 tarik Ïaïong, 2016.
Ka thong jong kane ka Dorbar Khynnah ka long ban lumlang ïa ki khynnah hapoh shnong ban ïatreilang na ka bynta kiba bun ki mat kiba tei ïa ka imlang sahlang.
Kum kane ka Dorbar Khynnah ka don ruh ha shnong Wahmawleiñ kaba hap ha kajuh ka thaiñ, bad kane ka shnong ka dei ruh kaba la ïohpdiang ïa ka khusnam na ka Sorkar Pdeng khyndiat snem mynshwa namar ka jinglah ban lehkhuid hapoh shnong bad jingdon ki khynnah kiba kitkhlieh ban sumar khuid ïa ka shnong.
Ka Dorbar Khynnah ka buh hakhmat eh kumno ban pynneh ïa ka khuid ka suba ha shnong ha thaw, ka pule puthi bad kam ïalehkai nalor ka jingïamir jingmut para khynnah ban don ka jingïatreilang bad ha ka liang akor ka burom.
Kumba long ki Dorbar Shnong kiba ju pynthymmai ïa ki nongkitkam, kumta kane ka Dorbar Khynnah ha shnong Mawlatbah ka la pynthymmai ïa ki nongkitkam kaba la pynlong ha ka Lah Sngi U Blei (4 tarik Nohprah 2023).
La pynthymmai ïa ki nongkitkam ka Dorbar Khynnah kiba kynthup ïa Pynshngaiñ Khongjoh kum u Sordar, Assistant Sordar Dayomi Suting, Secretary Darisha Kshiar, Assistant Secretary Juban Deipor Kshiar, Ribanjanai Kshiar, Publicity Secy Headingson Khongjoh, Sports Secy, Dancel Kshiar, Education Secy Ebanshisha Khongjoh lem bad 7 ngut ki dkhot.
Na ka liang u Sordar ka shnong Mawlatbah u Bah Maron Suting u la ong ba kane ka Dorbar Khynnah ka long kaba donkam shisha khamtam eh ha kaba dei bad ka khuid ka suba, ka pule puthi nalor ki kam ïalehkai sports khamtam eh ka jingïamir jingmut haba ïadei bad ka burom ka akor hapdeng ki para khynnah.
