Shillong, Nohprah 04
U Myntri Rangbah ka jylla u Conrad K Sangma ha ka Lah Sngi U Blei u la lum ïa ka jingïalang bad ki ophisar ka NHIDCL, ki Deputy Commissioner, ki tnat kiba dei khmih lem bad ki kontraktor ban shong bishar kam halor ki projek bapher bapher ba la pyntreikam da ka NHIDCL hapoh ka jylla.
Kane ka jingïalang ha kane ka sngi ka la shong bishar ïa ki projek surok kiba bun ba kynthup ïa ka surok Nongstoiñ-Wahkaji, Ranikor-Nonghyllam-Maheshkhola-Baghmara, Shillong-Dawki bad ka Western Bypass.
Haba kren sha ki lad pathai khubor, u Myntri Rangbah u la pyntip ba la dep ban bthah ïa baroh ki kontraktor ba kin buh noh ïa ki sngi ne tarik ban pyndep noh ïa ki projek bad ruh ban pynbeit ïa kino-kino ki jingeh kaba ki ïakynduh bad ki DC ne bad ki tnat kiba dei peit.
U Conrad u la ong naba mynta ka la dei ki bnai tlang bad kaba biang bha na ka bynta ban pyntrei ïa ki kam ne ki projek, kumta la bthah ïa ki ophisar ba kin pynsted noh ïa ki kam bad ban pynthikna ba yn lah ban pyndep ïa ki projek ha ki por kiba biang.
“Ha kane ka jingïalang, ngi la dep ban peit bad bishar ïa baroh ki projek kiba kham kyrpang ïa kiba la pyntreikam da ka NHIDCL, bad ngi don ka jingkyrmen ba ïa kine ki projek yn lah ban pyntrei bad pyndep ha ka por kaba biang,” la ong u Myntri Rangbah.
Haba kylli halor ki jingeh ba ka Sorkar ka ïakynduh haba pyntreikam ïa kum kine ki projek, u Myntri Rangbah u la ong ba ki don bun ki jingeh bapher bapher, kata ha kaba ïadei bad ki jaka, ka jingmynjur na ka tnat Khlaw bad bun kiwei kiwei, ïa kiba kum ka sorkar ka ïai pyrshang ban pynbeit.
Shuh shuh u la ong, wat la ka jingïalang shong bishar kam halor kine ki projek ka la ïaid bad neh haduh kumba lai kynta eiei hynrei ka la long pat kaba seisoh bad kaba biang bad paka shibun.
