Shillong, Nohprah 04
U President ka Khasi Authors’ Society (KAS), Dr. D.R.L. Nonglait ha ka Lah Sngi U Blei u la kren shai ba un ym pan tiket shuh ban ïakhun ïa ka ilekshon ban wan sha ka Lok Sabha la ka long na ka United Democratic Party (UDP) ne na kano-kano ka seng saiñ pyrthei.
“Nga kwah ban kren shai ba ha ka jingshisha ym dei ma nga ba pan tiket. Ki la don katto-katne ki dkhot ka UDP kiba la tyrwa ïa ka kyrteng jong nga. Ym dei ba ki tyrwa tiket ïa nga, hynrei ki tyrwa ïa ka kyrteng jong nga,” la ong u Dr. Nonglait haba pynshai ïa ka jingpaw kyrteng jong u kum uwei na kiba kwah ïakhun ïa ka ilekshon MP na ka UDP.
Haba pynkynmaw ba u dang don sha Delhi na bynta ka ‘National Seminar’ halor ka Ktien Khasi haba u la ïohi ïa ka khubor haba ïadei bad ka jingmih kyrteng jong u, u la ong ba u la pan jingshai na ki nongïalam ka seng halor katei ka bynta.
U la ong ba ynda u la wan sha Shillong, u la ïakynduh ïa ki nongïalam ka seng bad hadien ka jingïakren, u la shem ba kam long kaba biang ïa u ban ieh noh ïa ka kam kaba u bat mynta.
“Na kata ka daw, ngan ym pan ïa ka tiket na ka UDP ne na kano-kano ka seng,” ong u Dr. Nonglait.
Haba kylli la ka dei ka jingangnud jong u ban ïakhun shuwa ban pynrung ïa ka Ktien Khasi ha ka Khyrnit Baphra ba nym shim ïa katei ka sienjam, utei u nongïalam u la kubur ba kane ka long kawei na ki daw namar ka jingdawa jong ka KAS ka dang long kaba jur.
“Nga dang donkam ban ïalam ïa ka KAS bad ka samoi treikam kan dang kut haduh u 2025. Ngam mut ban ong ba ngi kyrduh briew ha ka KAS. Ka shu long ba ka jingdawa ka dang donkam ba ngan trei, bad kawei ka long ban dawa pynlong ‘Official Language’ ne Ktien Sorkar ïa ka Ktien Khasi,” u la ong, da kaba bynrap, “Ban leit noh sha ka kam saiñ pyrthei na ka jinglong nonghikai, ka dei ka rai kaba nga hap pyrkhat bunsien.”
Haba jubab, u la ong ba man ba long Dorbar Parliament, ki MP kiba kwah ban kren ha ïingdorbar ki ju kynjoh ktien ïa u bad u hap ban phah ïa ki jingtip, ki kot ki sla na bynta ba kin leh ïa kaba donkam.
“Kiba bun ki ïohi ba ka don ka nongrim lada nga leit ban kren hi ïa kane ka kam ha ka jaka ba ngan shu ai jingtip sah la da ki 10-15 snem. Hynrei kam dei pat kaba suk ïa nga ban shim ïa kata ka sienjam namar ban ïaleh ïa ka ilekshon MP kam dei ka kam kaba rit…ki jingkit kiba nga bat mynta ruh ki long kiba bun syrtap kiba ngam pat sngewlong ba ngan ieh noh ïa ki,” la ong u Dr. Nonglait.
Na ka liang jong u, u la pynshai ruh ba um don bynta eiei ban ïaknieh tiket na ka UDP na bynta ka ilekshon MP ban wan kumba la paw ha ki lad pathai khubor.
“Ki la don ki lad pathai khubor kiba ong ba ka don ka jingïaknieh kaba jur ïa ka tiket UDP…hynrei lada don kaba kum kata, kam dei na ka liang jong nga,” u la ong.
Halor ka jingmih khubor ba ka la don ka jingpynkhreh shaid-shaid ba un rung noh sha ka UDP lyngba ka Mawthadraishan UDP Circle, u Dr. Nonglait u la pynshai, “Khlem pep ka don ka jingkwah, mano bym kwah ban ïatreilang, hynrei ka jingïatreilang jong nga ka long na bynta ki mat treikam.”
Shuh shuh u la bynrap, “Hynrei ngam pat shym ai ktien ba ngan rung noh sha ka seng bad khamtam mynta haba ngam don jingmut ban ïakhun ïa kano-kano ka ilekshon, te ka jingkylli ban rung sha ka UDP ne kano-kano ka seng kam mih.”
