Aizawl, Nohprah 05 (UNI)
Ka sorkar bathymmai ha Mizoram hapoh ka jing-ïalam ka Zoram People’s Movement (ZPM) kan bam smai ha Raj Bhavan ha Aizawl ha ka 8 tarik Nohprah, la ong ki khubor ha ka Sngi Ba-Ar.
Ki khubor ki ïathuh ba u Lalduhoma, nong-ïalam ka ZPM bad u ban sa shimti kum u Myntri Rangbah, u la pynpaw ba ka jingbam smai kan long ha ka por 11 baje mynstep ha ka 8 tarik Nohprah.
U Lat ka jylla, u Hari Babu Kambhampati, un sa pynbam smai ïa u Myntri Rangbah bad kiwei pat ki Myntri.
Ki 27 ngut ki MLA ka ZPM ki la ïakynduh ha ka miet Sngi Ba-Ar ha kaba ki la jied ïa u Lalduhoma ban long kum u nongïalam ki MLA ha Ïingdorbar Thawaiñ bad kane kan long ka jingsdang jong ka jingïaid lynti ban shimti ïa ka shuki Myntri Rangbah.
Lashai ka sngi, u Lalduhoma un ïakynduh ïa u Lat ban pyni ïa ka jingbun paid ban thaw ïa ka sorkar bathymmai ha Mizoram.
U Myntri Rangbah Zoramthanga u la dep ban aiti ïa ka shithi iehnoh kam sha u Lat ha ka Lah Sngi U Blei hadien ba ka la shai ba ka MNF ka la shah weng na ka bor.
U Lalduhoma un long u Myntri Rangbah banyngkong tam ka Mizoram naduh u snem 1987 u bym dei na ka seng Congress lane MNF.
Ha kawei pat ka liang, ki 10 ngut ki MLA ka MNF ki la ïakynduh mynta ka sngi bad ki la jied ïa u Myntri barim ka tnat pule dangle, u Lalchhandama Ralte, ban long kum u nongïalam jong ki ha Ïingdorbar Thawaiñ.
Na ka liang u Zoramthanga, hadien ba u la shim jingkitkhlieh ïa ka jingshah rem jong ka MNF ha ka ilekshon, u la leit ai ïa ka shithi iehnoh kam kum u heh duh ka seng ha ka Sngi Ba-Ar.
U Zoramthanga, 79 snem ka rta, uba la shah rem ha kane ka ilekshon na Aizawl East-1, u la aiti ïa ka shithi iehnoh kam ha u Senior Vice President ka MNF, u Tawnluia.
Ha ka shithi iehnoh kam, u la pynpaw ba u sngewdei ban shim jingkitkhlieh halor ka jingshah rem jong ka MNF na ka daw ba u dei u heh duh jong ka seng.
“Nga sngew ba ka dei ka kamram jong nga ban iehnoh ïa ka kam President ka MNF bad nga khmih lynti ba yn pdiang ïa ka jingiehnoh kam jong ka,” la ong u Zoramthanga.
U Tawnluia u la ong ba ïa ka shithi iehnoh kam jong u Zoramthanga kum u President ka MNF yn sa ïakren ha ka jingïalang ka Political Affairs Committee (PAC) bad National Core Committee (NCC) jong ka seng ka ban long lashai ka sngi ha Aizawl.
Kane ka dei ka sien banyngkong ba u Zoramthanga u la aiti ïa ka shithi iehnoh kam kum u President ka MNF watla kane ka seng ka la re teng ha ki ilekshon ha u snem 1989, 1993, 2008 bad 2013.
U Zoramthanga, uba dei uba ïajan bad u nongseng ïa ka MNF, u Laldenga, u la long u President ka MNF ha ka 7 tarik Naitung, 1990 hadien ka jingkhlad noh u Laldenga.
