Shillong, Nohprah 05
Ka tnat Social Welfare jong ka sorkar jylla ha ka Sngi Ba-ar ka la pynlong ïa ka prokram Drug Rehabilitation, Elimination and Action Mission (DREAM) bad ka Bringing Unity in Locale Against Drugs (BUILD) kiba dei ki artylli ki prokram halor ka jingtehlakam ïa ka jingjyllei jong u drok hapoh ka jylla.
Ïa katei ka prokram la pynlong ha U Soso Tham Auditorium ha ka jingïadonlang jong u Myntri ka tnad Social Welfare, u Bah Paul Lyngdoh, ka Myntri ka tnad ka koit ka khiah, ka Dr. Mazel Ampareen Lyngdoh, u MLA ka Mawkyrwat, u Bah Renikton Lyngdoh Tongkhar, u Director General of Police (DGP), u Dr. L. R Bishnoi bad kiwei kiwei ki heh ophisar bad ha katei ka sngi u Myntri Rangbah ka jylla, u Conrad K Sangma u la long kum u kongsan.
Haba ai jingkren ha katei ka sngi, u Myntri Rangbah ka jylla, u Conrad K Sangma, u la pynpaw ka jingsngewkmen ba u la don bynta ha katei ka sngi, bad kumjuh ruh ban plie ïa ka prokram BUILD kaba dei halor ka jingrat dyngkhong ïa ka jingkyrni u drok hapoh ka jylla.
U Myntri Rangbah u la ong ba ki khun samla ki dei kiwei kiba lah pynmih ïa ka jingdon jingem na ka bynta ka jylla bad ka ri baroh kawei.
“Kiba bun ki rukom treikam bad ki prokram jong ka sorkar ki dei na ka bynta ki khun samla ban ai ka jingkyrshan ban ngin ïaleh tyngeh kaei kaba kham donkam ïa ngi ka long na ka bynta ki khun samla jong ngi”, la ong u Myntri Rangbah.
Shuh shuh u Myntri Rangbah u la ong ba ki khynnah kim ïoh satia ïa ka jingbtin lynti ha ka por kaba biang bad kane kadei kawei na ki daw tynrai kaba la ïalam sha ka jingkyrni ïa u drok.
Ha kajuh ka por, u la kdew ruh halor kumno ki jait prokram bapher bapher jong ka sorkar jylla kiba kynthup ïa ki jingïalehkai kilan met, ka jingput jingtem bad ka jingseng kam lade, ki dei kiba don jingïadei bad ki khun samla khnang ba kin lah ban pyni ïa ka sap ka phong bad ka jinglah jong ki ha ki jingïalehkai bad ha ki kam bapher bapher bad kin nym ngop satia ha ka ban pyndonkam ïa u drok.
“Shisien ba ki don ka thong bad ka jingthmu ha ka jingim jong ki, kin pynleit jingmut bad kin trei shitom haduh ba kin da ïoh ïa ka jingkwah”, la ong u Myntri Rangbah.
U Myntri Rangbah u la pyntip ruh ba ka program CM Elevate kan don ïa ka jaka ban buh kyrpang na ka bynta kiba kwah ban ïehnoh ïa u drok, bad na ka bynta kito kiba seng kam lade, kiba la iehnoh bad kiba khlem pyndonkam shuh ïa u drok.
Ha kaba ïadei pat ka prokram BUILD, u Myntri Rangbah u la ong ba ka jylla Meghalaya ka dei kaba khlaiñ bha ha ki bor synshar shnong bad ki nongsynshar shnong ki don ïa ka bynta bapher bapher ha ka imlang ka sahlang.
“Na ka bynta ka jingeh kaba ka imlang ka sahlang ka mad kum ka jingkyrni ïa u drok, ki nongsynshar shnong ki dei kiba donkam ym tang ban pynduhjait ïa u drok hynrei ban buh ruh ïa ki jaka ai jingsumar na ka bynta kito kiba la kyrni ha u drok”, la ong u Myntri Rangbah.
U la ong ba watla ki tnad bapher bapher jong ka sorkar jylla ki la ïatrei ryngkat ban rat dyngkhong ïa u drok kum ka tnad pulit, ka tnad ka koit ka khiah bad ka tnad Social Welfare hynrei ka long ruh kaba donkam ban ïatreilang ryngkat bad ki nongsynshar shnong bad ki nongshong shnong ruh kumjuh.
Na ka Liang u Myntri Sorkar, u Bah Paul Lyngdoh, u la ong ba ka sorkar ka ïai trei shitom ban pyntikna ha ka ban rat dyngkhong halor ka jingpyndonkam ki briew ïa u drok hapoh ka jylla bad ka sokar jylla ka la ïaleh tyngeh ha kaba ïadei bad kane.
U Bah Paul u la ai khublei ruh ïa ki sengbhalang, ki nongkitkam ñiam, ki dorbar shnong kiba la ïasnohkti lang ban ïarap ha ka ban tehlakam ïa ka jingdon u drok hapoh ka jylla.
Ha katei ka sngi ki nongshah khot sngewbha bad ki nongmihkhmat jong ki kynhun bapher bapher bad ki kynhun niam ki la ïasoi ïa ka Community Accord ban ïakhun tyngeh halor ka jingkyrni pyndonkam ïa u drok bad u Myntri Rangbah u la aiti ruh ïa ka song pisa kaba T. 6 lak sha ka Mawlai Dorbar na ka bynta ka sienjam bad ka jingtrei shitom ban buh ïa ki jaka sumar na ka bynta kiba la ngop ha u drok.
Ha katei ka sngi, u Myntri Rangbah u la pyntip ba ka project DREAM ka la sdang ban treikam ha Nongbah Shillong, bad shen yn sa sdang sa ha Jowai bad kumta ter ter, bad namar ka jingdonkam ban hap peit bniah ïa ki jaka, kumta ka jingpyntreikam ïa kane ka prokram sha kiwei pat ki jaka ka dang ïaid Suki Suki.
Haba kren halor ka jingdon ki jaka sumar shimet kiba ka dor jingsiew ka rem bad ka shem jingeh ïa kiba kyrni drok ban siew, kumta u Myntri Rangbah u la ong ba ka sorkar kan ïatreilang bad ki jaka sumar shimet bad ki sengbhalang bapher bapher ban wanrah ïa ki lad jingïada na ka bynta kito kiba kyrni ïa u drok. Da kane ka jingïatreilang kine ki jaka sumar shimet ruh kin lah ban ai ka jingsumar kaba biang tam ha ka dor kaba biang.
