Shillong, Nohprah 05
U Director General of Police (DGP) ka Jylla u Dr. L.R Bishnoi u la batai shaphang ka jingma na u drok kaba la pyni ïa ka jingïapher tang ha kine ki ar snem, 2022 bad 2023 lyngba ka jingïoh kurup drok, ka jingkem ïa kiba donkti ban pynïaid ïew, bad jingkylla ka Meghalaya kum ka ktem drok ym shuh kum mynshwa ba ka dei tang ka lynti ïaid.
U DGP u la pynpaw ïa kane haba ai jingkren ha U Soso Tham Auditorium ha ka Sngi Ba-ar ha ka jingïakynduh lang jong ki nongkitkam shnong, ki nongïalam niam ha kaba la banjur ïa ka jingdonbynta lang ki shnong ki thaw bad kiwei kiwei ki kynhun ban ïakhun pyrshah ïa u drok lyngba ka Drugs Reduction Elimination Action Mission (DREAM).
Ki jingïapher tang hapdeng ar snem ki la bun katkum ka jingbatai u DGP namarba mynshwa ka Meghalaya ka dei tang kum ka lynti ïaid u drok, hynrei mynta pat ka dei ka ktem une u jingdih bashyrkhei tam ban pynsniew ïa ka imlang sahlang, bad mynshwa ki don tang ki shynrang kiba kyrni hynrei mynta ki kynthei ruh ki bun bha.
U Dr. Bishnoi u la ong ba u drok u la nang jyllei bad ki kam runar ruh ki la nang kiew naduh ki jingïakajia ha ïing hasem bad ïamai shikurim. U la ong ruh man ka sngi kumba 3 tylli ne 4 tylli ki jingjia takhuh kali ha surok ki jia na ka daw ka jingdon kiba dih drok bad kiwei ki jingdih basniew kiba pynbuaid.
Haba pynïapher ha kine ki 2 snem, u la ong, ki don 116 tylli ki jingpynrung ha ka jingmudui namar u drok ha u snem 2022 kaba la kiew sha ka 183 tylli haduh mynta u 2023. Kiba shahkem ki long 234 ngut ki nongkhaïi ha u snem 2022, hynrei haduh mynta 2023 ki don 349 ngut.
U ‘heroin’ ba ïoh kurup ha u snem 2022 u long 7.5 kilo hynrei haduh mynta 2023, la ïoh kurup 16.7 kilo u drok heroin uba ïaid ïew bha bad uba lah ban pynngop ïa ki briew.
Haba batai shuh shuh, u DGP u la ong ba u kynja ba ïoh kurup u long 1400 kilo ha u snem 2022, hynrei haduh mynta 2023 la ïoh kurup 4000 kilo, ki dawai kuli Yaba Tablet la ïoh kurup 13000 ha u 2022 hynrei haduh mynta 2023 la ïoh kurup 61000, nalor kiwei kiwei ki kynja dawai kum ka Cough Syrup.
La ïoh kurup ruh ïa ki mobile phone 187 tylli ha u 2022 bad haduh mynta 2023 la ïoh kurup mobile phone palat 400 tylli, nalor ki kali 67 tylli ha u snem 2022 bad 156 tylli ki kali haduh mynta 2023 la ïoh kurup.
U DGP u la ong ruh ba ha u snem 2022 ki thanat kiba hap ïakhun ïa u drok ki don 28 tylli hynrei mynta ki long 42 tylli. Kito kiba la ïai mlien biang ban khaïi drok kiba la pynngat hapoh ka PIT NDPS ki don 15 ngut ha u snem 2022 bad mynta u snem 2023 kiba mlien ban leh biang ki don 30 ngut.
Ka pisa ba ïoh kurup ha u snem 2022 ka long T.37 lak hynrei haduh mynta 2023, la ïoh kurup pisa T.47 lakh.
Kumta u DGP u pan ïa ka jingïatreilang jong baroh khamtam ha shnong ha thaw ban rat dyngkhong ïa u drok bad pynlong ïa ka Jylla Meghalaya kum ka Jylla kaba lait na une u jingdih ba sniew tam.
U DGP u la ïathuh ba haba kheiñlang ïa ka dor jong u drok bad kiwei ki jingdih basniew kiba la ïoh kurup, ka shongdor T.461 klur.
