Shillong, Nohprah 05
U Lamphang (Speaker) ka ïingdorbar thawaiñ ka Jylla u Thomas A Sangma ha ka Sngi Ba-ar u la hiar ban jurip ïa ka jingtei kaba dang ïaid shakhmat jong ka ïingdorbar thawaiñ bathymmai ha Mawdiangdiang, New Shillong Township.
Ha kane ka jingjurip hadien ba u la ïoh ban sakhi ïa ka jingtrei kaba dang ïaid shakhmat bad lyngba ki jingtip na ki ophisar, u la buh ïa ka thong ba ïa kane ka ïingdorbar dei ban pyndep hapoh u bnai Nailar jong u snem 2024, na ka bynta ban ïoh shong ïa ka Dorbar Synrai.
Hadien ba u la dep ban jurip, na ka liang u Lamphang u la lum pat sa ïa ka jingïalang ban ïakren bad khmih biang halor ka jingïaid ka jingtrei jong kane ka ïingdorbar. Ha kane ka jingïalang la ïadon lang ryngkat u Symbud Lamphang ka ïingdorbar u Timothy D Shira, u Commissioner and Secretary ka Meghalaya Legislative Assembly Bah Andrew Simons, ki ophisar na ki tnat treikam bapher ka sorkar lem bad kiwei.
Na ka liang jong u Thomas A Sangma hadien ba u la dep ban jurip bad shong bishar kam, u la pynthikna ba ïa kane ka ïingdorbar yn pyndep kham kloi katba lah. U la pyntip ruh ba ka por kaba la buh ban pyndep ïa ka ïing paki jong ka ïingdorbar bathymmai ka long ha u bnai Naitung ne Nailar, 2024. Ka jingthmu hi ka long ban ïoh pynlong ne shong noh ïa ka dorbar synrai ha kane ka ïingdorbar kaba thymmai.
Haba kren ha ka jingïalang, u Lamphang u la ong, “Ngi la khot ïa ki tnat bapher bapher ha kane ka sngi, kata ngi la khot ïa ka PHE ka ban shimkhia ha kaba ïadei bad ka jingpynpoi um hapoh ka complex, ka Social Forestry ban pynitynnad ïa ka phyllaw bad sawdong sawkun, ka Arts & Culture ka ban pynitynnad ïa ka rup ka rong ka ban long na la tynrai jong ka ïingdorbar bad ruh kiwei ki tnat kum ka IT bad NIC. Ngi la dep ruh ban shim ki jingai jingmut na ki tnat bapher bapher, bad ka jingtrei ruh ka la ïaid ha ka rukom kaba paka, kumta ngim kwah ba kane ka kam kan suki”.
Haba jubab pat halor ka jingshna ïa ka tnum pyllun ne dome, u Lamphang u la pyntip ba baroh ki lyngkhot lyngkhai na ka jingtwa la dep ban pynkhuid lut bad ka jingbuh dak ïa ka jingtei ka la ïaid shaid-shaid. U la pyntip ba ïa ka tnum pyllun bathymmai yn tei noh da kaba pyndonkam ïa ki prefabicrated steel ki ban sa poi ha une u bnai ba mynta bad Kyllalyngkot. La khmih lynti ba ka jingpyndait ïa kine ki steel kan sdang ha u Rymphang bad yn dep ha u Ïaïong.
Nalor kane, u la pyntip ba ka jingtei ïa kane ka tnum pyllun bathymmai kan dei kaba khmih lang da ka IIT Guwahati bad IIT Roorkee.
Haba kren halor ka Phase-II jong ka projek, u Lamphang u la pyntip ba ka Ministry of Development of North East Region (DoNER) ka la ai jingkular ban bei tyngka ïa ka Phase-II bad ka jingpynkhreh ïa ka Detailed Project Report (DPR) ka la ïaid shakhmat.
