Nongpoh, Ïaïong 24
Ka Ri-Bhoi Youth Fede-ration (RBYF) hadien ka jingshong jingïalang jong ka Central Executive Committee (CEC) ha ka Sngi Thohdieng ha ophis treikam ka seng ha Saiden ka la pynpaw ba kan pyrshah jur ïa ka jingtei ïa ka Taj Resort & Spa ha Umïam katba ka Sorkar Jylla kam pat lah ban pyntreikam ïa ki 2 tylli ki mat jingdawa jong ka seng ba kynthup ïa ka Inner Line Permit (ILP) bad ban pynheh ïa ka kad liengsuiñ ha Umroi.
Haba kren sha ki lad pathai khubor, u Bah Bipul Thangkhiew, President ka seng u la ong ba ka RBYF baroh shi katta kam banse ban shu sngap jar halor kane ka jingthmu ka Sorkar namar ka jingdon jong ka ‘General Council’ ka seng ha kine ki khyndiat sngi ba lah dep bad ba ka seng ka la ïohi ruh ïa ki jingjia na ka jingïakhih jong ka Green Tech Foundation (GTF) ha kine ki sngi kiba la dep.
Utei u nongïalam ba rangbah ka seng u la ïathuh ba kiba bun na ki paidbah, khamtam kito kiba ju ieid bad shaniah ha ka seng, ki la ‘phone’ bad wad jingtip na u halor ka nongrim jong ka seng ha kaba ïadei bad katei ka jingthmu tei ka Sorkar ïa ka ‘Taj Resort & Spa’ ha Umïam, hynrei u la jubab ïa ki ba ïa kane ka mat yn hap ban ïatai shuwa ha ka CEC – ka seng kaba la buh ban pynlong mynta ka sngi.
U la ïathuh ba ha ka jingïatai kaba bniah kaba mynta ka sngi, ka seng ka la shim ïa ki rai ba kan ïeng ha ka nongrim kumba dawa pynïoh shuwa ïaka ILP kumba ka la shim naduh ki snem kiba mynshuwa bad ka la shim ruh ïa ka rai ba ka Sorkar ka dei ban pyndep shuwa ïa ka jingpynheh ïa ka Kad Liengsuiñ ha Umroi khnang ba ki liengsuiñ heh kin ïoh ban wan hiar ha katei ka jaka.
Haba pynshai halor kitei ki mat jingdawa, u Bah Bipul Thangkhiew u la ong ba lada tei ïa katei ka Taj Resort & Spa ha Umïam, hynrei katba ïa ka kad liengsuiñ ym pat lah ban pynheh, ki nongwan jngohkai kin hap ban hiar ha ka kad liengsuiñ Lokapriya Gopinath Bordoloi Airport ha Guwahati bad ki ban ïoh jingmyntoi ki dei ki nongñiah kali na Assam katba ki khun samla “jong ngi” pat kin shu long tang ki nongpeitkai.
Ha kaba ïadei bad ka ILP pat, u Bah Bipul Thangkhiew u la ong ba ka por ka la dei ïa ki nongmihkhmat ba kim dei shuh nangne shakhmat ban ïa kdew kti kumba la sakhi hapoh ka Ïingdorbar Thawaiñ, hynrei ba u Myntri Rangbah ryngkat bad baroh ki MLA ka Jylla ki dei ban shim ïa ka jingkitkhlieh kumba ki la dep ban shim rai ha u snem 2019 na ka bynta ban pyntreikam ïa ka ILP wat lada dei ban leit shong shah thngan sha ka nongbah Delhi ruh bad ba na ka liang jong ka seng ruh kan ai jingkyrshan ban leit shah thngan lang tad haduh ban ïoh ïa ka ILP.
U Bah Bipul Thangkhiew u la ong ruh ba lada ka Sorkar Jylla ka lah ban pynurlong shuwa ïa kitei ki ar tylli ki mat jingdawa, ka seng kan ym don kano-kano ka jingpyrshah lada ki wanrah ïa ki ‘5-Star’, ki ‘7-Star’ ne wat ki ’10-Star Hotel’ ruh ha ka Jylla, hynrei kumba ka long mynta, ka seng kan pyrshah ruh wat ban tei ïa ka Taj Resort & Spa ha jaka ba ka don ka Orchid Lake Resort kaba mynta.
Ha kaba ïadei pat bad ka dewlynnong Lumpongdeng, u Bah Bipul Thangkhiew u la ong ba kumba long mynta, ka seng kam pat don jingtip satia halor ka jingshah kthah ïa mariang ha katei ka jaka bad ba shu bna ba kiba kam ïa ka jingwan jong ki sim kiba wan her na kylleng ka pyrthei ha katei ka jaka, hynrei ïa mynta ka seng ka tip tang ïa ka jingwan jong ki sim ‘Amur Falcon’ ha ki thaiñ Tyrso bad ba ka seng kam pat kwah ban kren ïa kane ka bynta, hynrei kan shim beit kumba la mih ha ki kotkhubor ba yn tei ïa ka Taj Resort & Spa ha ka Orchid Lake Resort.
Ha kajuh ka por, utei u nongïalam, u la pynpaw ruh ïa ka jingsngewtynnad ïa ka Green Tech Foundation (GTF) kaba shim ïa kane ka sienjam ym tang ïa u Lumpongdeng hynrei wat ïa kiwei kiwei ruh ki mat kiba ktah ïa ka mariang ha ka Jylla.
