Shillong, Nohprah 05
U Myntri ka tnat Jngohkai u Bah Paul Lyngdoh u la ong ba ka mang pisa na ka bynta ki jingtei hapoh ka ‘Rural Eco Tourism Circuit’ ha ki 12 tylli ki jaka ha Rilum Garo lyngba ka North Eastern Council (NEC) ka long T.14.39 klur bad u la buh jingkylli kylla ïa ka jingkynnoh ba ka don ka jyrsieh haduh T.1300 klur haba ïadei bad kine jingtei jingshna.
Haba kren sha ki lad pathai khubor ha ka Sngi Ba-ar, u Bah Paul u la ong ba na ki 12 tylli ki jaka kiba tei lyngba ka ‘Rural Eco Tourism Circuit’, 9 tylli ki dei ha East Garo Hills, kawei ha West Garo Hills bad 2 tylli ha South West Garo Hills district.
Une u Myntri u la ïathuh ba ïa kawei-kawei ka jingtei la mang 99 lak,91 hajar, 467 tyngka bad ïa kawei ka surok la mang 2 klur, 40 lak tyngka.
U Bah Paul u la ong ba kine ki jingtei kiba long kum ki jaka sah, la aiti ban pyntrei ïa ka kam naduh u bnai Jylliew ha u snem 2017, hynrei namar ki katto-katne ki daw khamtam ba don ka ilekshon shiteng samoi ha East Garo Hills bad jingshah ktah ha u COVID-19 bad ki jingpyrkhing ha ka por ba pynjari ïa ka jingkhangdam ym shym la lah ban pynïaid sted ïa ki kam.
Kumta dei haduh u bnai Jymmang, 2021 ba ki kam ban pyndep ïa ki jingtei ki la ïaid shaid-shaid ha kaba ki don ki jingtei kiba la dep ban trei bad ki don ruh kiba lajan dep artad.
Shuh shuh u Bah Paul u la pynshai na ka T.14.39 klur, ka pisa kaba la dep pyllait bad siew sha ki kontraktor ka long 1361.41 lak tyngka, bad kata ka jingkynnoh ba ka don ka jyrsieh kaba 1300 klur ka dei ka bym don nongrim eiei.
U Bah Paul u la ong ba kane ka jingkynnoh ba ka don ka jyrsieh ka dei kaba pynjahburom ïa ka tnat jngohkai bad ïa ka Sorkar namar tang ka mang tyngka jong ka tnat jngohkai jong une u snem ka dei T.91 klur bad Meghalayan Age Limited ka dei T.130 klur.
