Shillong, Nohprah:
Ka Vi, kaba long ka kompani ban ai jingshakri ha ka liang ka Telecom, ka la lah ban ïoh ïa ka Guinness World Record namar ka jinglah jong ka ban ai Notebook kaba heh tam, bad kane ka pynpaw ïa ka jingtreikam ba radbah sha ka jingïalap paidbah kaba long ‘Be Someone’s We’, kaba thmu ban wanrah ïa ka jingïeid bad ka jingkit khia hapdeng ki briew, kiba pyndonkam 23071 ki Notebook. Ka Vi ka la noh synñiang ïa palat 23000 sha ki khynnah kiba duna ka ïoh ka kot lyngba ka tnad pule puthi, ka sorkar Uttar Pradesh.
U Symbud Myntri Rangbah ka jylla Uttar Pradesh, u Brijesh Pathak Ji, u la ïadon lang ban kyrshan ïa kane ka sienjam treikam da ka Vi. U la pynlut ïa ka por jong u bad ki khynnah na ki NGOs bad ki nongtrei ka Vi ban ai mynsiem ïa baroh na ka bynta kane ka World Record. Ha ka Janeshwar Mishra Park ha Lucknow, Uttar Pradesh, palat 700 ngut ki briew, kynthup ruh ïa ki nongtrei ka Vi bad ki bahaïing hasem, bad ki 500 ngut ki khynnah kiba duna ka ïoh na kot na ki kynhun treimon sngewbha bapher bapher, ki la lah ban ïoh sam ïa ki Notebook ha ka rukom kaba heh tam ha ka pyrthei, bad kane ka ïarap ban kyntiew ïa ka mynsiem jong ka jingkynthup lang ïa ki briew bad ka jingïatreilang lyngba ka khubor ‘Be Someone’s We’.
Haba pynpaw ïa ka jingkmen ban ïoh jam sa sha une uwei u mawmer u Pravir Kumar, Operations Director, Vodafone Idea, u ong, “Mynta ka sngi ngi la lah ban long, ‘We’ ne ‘Mangi’ na ka bynta ki khynnah, bad ngi thrang ban ïai bteng ïa kane ka jingïaid lynti jong ka jingïatreilang na ka bynta kiwei ruh kumjuh.”
Ka Vi kan noh synñiang haduh 23071 ki Notebook ba la pyndonkam na ka bynta ka World Record sha ka tnad pule puthi- ka Uttar Pradesh. Ka thong ka long ban pyni kumno la treikam ban wanrah lang ïa ka imlang-sahlang, ba la lah ban thaw ruh ïa ka jingïajan hapdeng ki briew, ka kyntiew ruh ïa ka mynsiem jong ka jingkynthup lang, bad wanrah ïa ka mynsiem jong ka jingïatreilang, ba la ïoh mynsiem na ka jingim ba man la ka sngi.
