Shillong, Nohprah 05
U Dr. Ricky A.J Syngkon uba dei u kyrtong MP Lok Sabha na Shillong Parliamentary Konstitwensi jong ka Voice of the People Party (VPP) u la pyntip ba ki dang bun ki shnong kiba um pat poi lut hynrei un pyrshang ban poi lut sha ki shnong jong ki 36 tylli ki konstitwensi haduh ban da dei ka por thep vote.
U Dr. Syngkon u la ïathuh ba man ba ka seng VPP hapoh ka jingïalam u Bah Ardent Basaïawmoit ki leit sha ki shnong, u ïoh lad ban ai jingpynshai ïa ka nongrim jong ka seng.
Haba kylli kumno ka jingpynkhreh ïa ka ilekshon haba ka NPP kaba bat ïa ka bor synshar ha ka sorkar jylla ka la pynbna ïa ka Kong Ampareen Lyngdoh kum ka kyrtong MP na Shillong Parliamentary Konstitwensi, u Dr. Syngkon um kwah ban ong eiei namar ka rai baroh ka shong ha ki paidbah.
Haba kylli kan don ne em ka jingktah ïa ki seng riewlum namar ka VPP ka pynïeng kyrtong katba ka UDP kaba la kyrshan lang da ka HSPDP kin pynïeng ïa la u jong u kyrtong, u Dr. Syngkon u la ïathuh ba kan nym ktah namar ka shong ha ki paidbah ba kin bishar namar ka seng VPP ka don ha la ka jong ka nongrim.
U la ong ba haduh mynta ki shakri ki la kylla kynrad katba ki kynrad ki la kylla kum ki shakri namar ki shakri kim burom shuh ïa ki kynrad.
Shuh shuh haba kylli ïano yn pynïeng kyrtong ha ilekshon MDC na Umsning konstitwensi haba phim ïakhun shuh, u la pyntip kumba ka seng ka kwah ban don kawei ka kam haba u la shah jied ban long kum u kyrtong MP Lok Sabha un hap ban ïa pynbeit ïano yn jied ban ïakhun ïa ka ilekshon MDC ka ban sa long la shem snem.
Kum ban shu pynkynmaw, u Dr. Syngkon u dei u kyrtong uba la ïakhun ïa ka ilekshon MLA na Umsning konstitwensi, Ri Bhoi district hynrei mynta ka seng VPP ka la jied ïa u ban long kum u kyrtong MP Lok Sabha.
Nalor kane, u Dr. Syngkon u la ïathuh haba u leit ai jingkren sha ki jinglang u ju pynshai ba ki paidbah kin sngewthuh ïa ka jingkordor haba ki jied ïa u nongmihkhmat khlem da pyndonkam ïa ka pisa.
Namar kata, u don jingkyrmen ba ka VPP wat la ka dei ka seng kaba thymmai hynrei u la ïohi ïa ka jingshitrhem ki paidbah namar ki kwah ban wanrah ïa ka jingkylla.
Halor ka ilekshon MDC, u la pyntip ba ka seng kan nym pat pynbna kyrkieh ïa ki kyrtong hynrei kan dang shong pyrkhat ynda la dei ka por kaba biang.
